АПЕЛ Сите донатори да ги пренасочат донациите кон здравствените работници

Сите донатори да ги пренасочат своите донации за потребите на здравствените работници, апелираше денеска директорката на Државен санитарен и здравствен инспекторат, Иринка Сотирова.

– Здравствениот систем во овој момент е консолидиран, цврсто стои, на дневна основа можни се и поедини проблеми од организациски тип, но тие се решаваат на дневна основа – рече Сотирова одговарајќи на новинарско прашање.

Таа апелираше до граѓаните да им веруваат на медицинските лица, а до нив пак да се заштитат себеси најдобро.

– Заштита на медицинските работници и обездувањето услови за максимална заштита во нивната секојдневна работа е приоритет. Министерството за здравство воведе протоколи за заштита на здравствените работници со детални објаснувања кој протокол каде се користи. Апелирам здравствените работници да ја носата опремата за да се заштитат себеси и сите околу себе и за да останат способни да се борате за животите на пациентите – рече Сотирова.

Таа најави дека Инспекторатот ќе продолжи со санкции за оние работници кои не ги почитуваат протоколите за заштита.