Апасиев потврди дека Левица има заробен депозит во Еуростандард банка: Ние сме учени без пари, баш герилски и партизански!

Димитар Апасиев, лидерот на „Левица“, на Фејсбук предмалку објави дека неговата партија има заробени пари во Еуростандард банка на која во мината недела ѝ беше одземена лиценцата за работа.

Тој најави дека Левица ќе води правна битка за поврат на заробените пари, но и дека следната година партијата ќе добие повеќе пари од државата поради резултатот на изборите. Апасиев вели дека Левица ќе бие битка и за „радикална реформа на лихво-банкарскиот сектор“.

„Гледам восклик од ситечка злорадост кај нашите политички непријатели, за блокираната голема сума пари на Левица во пропаднатата Еуростандард банка. И не им фаќам за зло. Тоа се таков калибар ситнобуржујски луѓе кои мислат дека парите се сè во животот. И затоа имам огромна жал за нив. А НИЕ…Ние сме учени без пари. Онака, баш герилски и партизански. Во тоа, всушност, лежи нашата сила!

Уште пред повеќе од една деценија, почнавме буквално од нула да градиме автентично политичко движење, кое сега расцветува како чиста совест на нацијата. Нас никогаш не ни е страв, пак од нула да почнеме! Во тоа е нашата величина. Оти сме троскот. Не можете нас да нè искорнете! Во тоа е нашата незгодност. Затоа, до сите наши стари и нови членови, симпатизери и сограѓани – имам само една порака: Не паѓајте во духот! Парите се битни, но не се најбитни. Лавината наречена Левица веќе е невозможно да биде запрена. Семето на Отпорот е посеано на плодна почва и на здрава основа. Раководството е консолидирано и има план за за акција“, порача Апасиев.

Претходно, Павле Богоевски, поранешен пратеник објави дека  „Левица“ има депозит поголем од 30.000 евра „замрзнат“ во Еуростандард, а поголемиот дел биле пари добиени од државата за предизборна кампања.