Јанушев: Шекеринска за 4 дена потрошила 1,3 милиони денари за патувања и за ручеци

Генералниот секретар на ВМРО-ДПМНЕ Игор Јанушев ја обвини денеска министерката за одбрана Радмила Шекеринска дека за ручеци и патувања потрошила над еден милион и 300.000 денари за 4 дена.

– И покрај тоа што има забрана за патување во странство, во екот на пандемијата со корона вирус, во периодот од 17 до 20 март оваа година, Шекеринска преку Министерството за одбрана потрошила 1 милион и речиси 43.000 денари за патувања. Во истиот овој период, за само 4 дена за репрезентација, ручеци и ресторани, Министерството за одбрана со кое раководи Шекеринска потрошило дополнително речиси 362.000 денари. Додека македонските доктори немаат маски, немаат респиратори, Министерството со кое раководи Шекеринска тие пари ги троши на патувања и ручеци. Додека Заев ќе крати плати на работници, Шекеринска троши на ручеци и патувања – вели Јанушев.

Тој смета дека „неспособноста на владата не треба да се прекрши врз грбот на работниците во администрацијата“.

– Мерката на Заев за урамниловка на примањата на функционерите, министрите и раководителите со примањата на работниците во администрацијата е погубна и неефикасна. Урамниловката на платите на функционерите со платите на работниците е сериозен удар за работниците, но и за здравото ткиво на економијата кое е непогодено од кризата затоа што во промет ќе има помала потрошувачка а со тоа и помалку пари. Со мерката кратење на плати во администрацијата Заев практично осудува на глад многу семејства. Затоа што потрошувачката кошница за минатиот март изнесувала 32.852 денари, а со плата од 14.500 денари каква што предлага Заев не може да се подмират ниту основните трошоци, а не пак за плаќање сметки за струја вода и други трошоци, дополнително на ова трошоци за кредит на едно семејство кое што најчесто сите ги имаме – вели Јанушев.

Од ВМРО-ДПМНЕ итно бараат да се примени нивниот антикризен план од 8 чекори.

1. Државата да покрие 50% од бруто трошоците за вработените, по основ на нето плати и придонеси, а не само нето плати како што предлага СДСМ.
2. Целосно да се замрзнат плаќањата на рати по основ на отплата на главнина и камати на граѓаните и бизнисот кон банките и заемодавателите.
3. Владата да се откаже од непродуктивните трошоци од буџетот и да овозможи безусловна интензивна реализација на капиталните инвестиции.
4. Владата да го покрие транспортниот сектор со укинување на плаќањето на патарина и царински давачки, како и да донесе одлука за укинување на сите давачки царински и даночни за набавка на здравствени маски, медицински препарати и уреди потребни за справување со корона вирусот.
5. Аконтацијата на данокот на добивка за месеците април, мај и јуни да биде одложена, а за истото ова треба да се примени и за ДДВ за месец март кој се плаќа до крајот на месец април за дејностите погодени од кризата.
6. Итно и целосно прекинување на непродуктивните трошоци за времени вработувања.
7. Да не се прави, односно да се откаже владата од урамниловка помеѓу платите на функционерите со платите на работниците во администрација и,
8. Веднаш да се обезбедат средства од 1 милијарда евра за да нема негативни последиците врз компаниите и стандардот на граѓаните. Од кој 600 милиони преку средства од Светска банка, ММФ и странски банки, и 400 милиони евра преку државни хартии од вредност кои ќе ги издаде министерството за финансии, со претварање на пасивниот капитал во актива.