Ангеловска ги претстави новите три промени за мерката 14,500 денари

На денешната прес-конференција на мнистерката за финансии, Нина Ангеловска и директорката на Управата за јавни приходи, Сања Лукаревска, како и директорот на Светска банка за Северна Македонија и Косово во рамките на регионот на Европа и Централна Азија, Марко Мантованели ги објавија новите олесувања повразни со мерката 14,500 денари.

– Оваа мерка ќе биде ко-финансирана со заем од Светската банка во висина од 50 милиони евра. Додека работевме на истата ги слушавме сите предлози од коморите, од бизниси-заедницата, сопствениците на микро и малите фирми и можеме слободно да кажеме сите овие предлози и сугестии се вградени сега во мерката и истото ќе биде препознаено – рече министерката Ангеловска.

Целта е да се зачуваат работните места (според проценките се работи за 200-250.000 работни места) и да се одржи ликвидноста на фирмите погодени од кризата со пандемијата.

Таа ги престави главните три промени во оваа мерка.

Како прво министерката го истакна дозволување на флексибилност во намалувањето на бројот на вработени, за што често добивале прашања од засегнатите страни, доколку работникот сам напушти, што ако станува збор за сезонски работни, доколку истекува договорот на работникот и слично.

– Поради тоа со ова се олеснува критериумот за задржување на бројот на вработени, односно со промената се олабавуваат условите за задржување на вработени. Првично во мерката беше укажано дека работодавачот треба да го задржи истиот број на вработени два месеци заклучно по користењето на мерката, односно до месец јули – рече министерката.

Сега флексибилноста е, односно намалување на бројот на вработени, до 15 проценти кај микро и малите компании, до 10 проценти кај средните компании и до 5 проценти кај големите компании.

– Со ова очекуваме да се спречи отпуштањето на работниците, но се зголеми опфатот на компании кои ќе аплицираат и кои директно ќе помогнат и ќе ги задржат работниците. Сметам дека ова е особено важно за малите и микро фирми – рече Ангеловска.

Втората промена е потикната со цел да поттикне поголема финансиска поддршка за компаниите кои се од најпогодените сектори – угостителство, транспорт и туризам.

– Овие компании кои што имаат нула приходи во овој период ќе може покрај аплицирањето за мерката 14,500 денари, да ја користат и мерката за субвенционирање на 50 проценти од придонесите која беше презентирана во првиот пакет анти-кризни мерки – вели министерката.

Користењето на оваа мерка ќе можат да ја остварат компаниите кои немале загуба во последните две години (2018-2019), не се на листата на должници на УЈП (03/2020), како и заклучно со 29.02.2020 не доцнеле со плаќање на обврските по основ на кредит подолго од 90 дена од денот на достасаноста.

Третата промена е поврзана со трансформирањето на финансиската поддршка во грант, па така микро, малите и средните компании нема да ја вратат добиената помош доколку ги исполнат условите: за претходните 2 години да имаат искажано добивка, да не се на листата на должници на УЈП, да не доцнат со плаќање на обврската по основ на кредити подолго од 90 дена од деност на достасаноста, како и да инвестираат еднаков или поголем износ на добиената поддршка во тренинзи на вработените, надградба на просеци, продуктивен капитал.

– Барањата за овие придобивки ќе бидат пропишани во следниот период, а секако за истите ќе се аплицира во 2021 година, односно со поднесување на даночната пријава за остварениот биланс. Значи се работи за здрави и добро обмислени критериуми, дополнителна флексибилност и сеопфатност со овие три клучни промени кои беа посочени – вели министерката за финансии.

Таа додаде дека работодавачите со оваа мерка ќе добијат 14,500 денари по работник за финансирање на потребните за исплата на платите за април и мај, додека работниците ќе добијат извесност во смисла за задржување на работните места во време на коронакризата.

Министерката рече дека оваа мерка се однесува за сите работдавачи од сите дејности кои ги исполнуваат условите, односно имаат најмалку 30 проценти пад на приходите во мај и април, просекот на највисоките плати на 10 проценти од вработените да не надминува 100.000 денари по вработен, како и да не исплаќаат дивиденди, бонуси, награди за деловната успешност за времетрање на мерката.

Оваа мерка се однесува за сите работници, кај сите работодавачи, освен за оние кои имаат повисока нето-плата од 39,900 денари, вработените за кои се користи ослободување на придонесите преку проектот „Македонија вработува“, како и вработените за кои се користи анти-кризната мерка за субвенционирање на придонесите (освен за најпогодените сектори).

Мерката според Ангеловска ќе може да се комбинира со други мерки за финансиска поддршка, како што е субвенција на придонесите за покачување на платата од 600 до 6.000 денари, потоа 50 проценти субвенција на придонесите за фирмите на најпогодените три сектори.

На крајот од своето излагање министеркат Ангеловска го појасни третиот дел кој е поврзан со враќањето и тоа кој, кога и колку враќа. Па така компанија која оставарила загуба нема да ја врати финансиската поддршка. Компанија нема да ги враќа средствата доколку истите ги инвестира во еднаков или поголем износ на добиената поддршка во тренинзи на вработените, надградба на просеци, продуктивен капитал кои ќе придонесат за дополнителен раст на истата. Фирма која забележала добивка во 2020 година ќе врати лимитиран износ до 50 проценти од добивката пред оданочување.

Директорот на Светска банка за Северна Македонија и Косово во рамки на регионот на Европа и Централна Азија, Марко Мантованели, пак, потенцираше дека повеќето од нивните препораки се вклучени во главната рамка усвоена од нашата Влада и оти неколку се дел од уредбата што беше претставена денеска за мерката.

– За да ги поддржиме нашите препораки за време на примената понудивме мобилизација од неалоцирани средства од проекти на Светска банка кои се веќе одобрени за финансирање на мерката на Владата за субвенција на платите за неколку месеци со тоа што тие треба да се насочат кон поддршката за добростоечки макро мали и средни претпријата врз основа на лесно применливи критериуми. Таргетирањето го правиме бидејќи веруваме оти тие претпријатија ќе бидат јадрото на економското закрепнување на земјата – наведе Мантованели.

Уредбата, појасни, укажува на тоа дека треба да постои одредена флексибилност за одлуката поврзна со оптималното ниво на вработеност откако состојбата ќе се нормализира. Таа предвидува за компаниите кои ќе остварат профит до крај на годината да имат можност да ги реинвестираат парите во нивниот бизнис за да ја унапредат својата работа наместо да ги враќаат во државнит буџет.

Долполнително добростоечките компании во тешко погодените сектори како што се туризмот,угостителството може да имаат корист од дополнителната поддршка која ќе дојде во форма на финансирање за потребите на покривање на дел од социјалните придонеси за вработените кои ќе ги задржат.

– Мислиме дедка ова се мерки кои може да помогнат на добростоечките компании да ја поминат кризата и да задржат задоволително ниво на вработени, рече Мантованели.