Ангеловска-Бежоска: Инфлацијата останува умерена
Гувернерката вели дека за нас, имајќи предвид дека ЕУ е најзначаен трговски партнер на нашата економија, особено е важно што ќе се случува со движењето на цените во ЕУ, каде што засега не се очекуваат позначителни промени,
Една од клучните одлики на нашата економија е одржувањето ниска и стабилна инфлација веќе подолг период наназад, при што, во просек, инфлацијата во последните години изнесува околу 1 отсто. Остварувањата минатата година и во првите два месеци од оваа година речиси во целост се во согласност со проекциите на Народната банка. Слично на очекувањата за движењата на цените во ЕУ – инфлацијата во македонската економија останува умерена. И најновите податоци и очекувања го потврдуваат одржувањето на ценовната стабилност.
Ова го изјави гувернерката на Народната банка, Анита Ангеловска-Бежоска за телевизија Алсат-М.
Осврнувајќи се на движењата на цените, таа рече дека во глобални рамки, во овој период, цените на примарните производи се променливи и во нагорна, и во надолна насока и дека засега, иако податоците и анализите упатуваат на нагорни поместувања, тоа не е на некое високо ниво.
– За нас, имајќи предвид дека ЕУ е најзначаен трговски партнер на нашата економија, особено е важно што ќе се случува со движењето на цените во ЕУ, каде што засега не се очекуваат позначителни промени, заради што ЕЦБ и продолжува со олабавената монетарна политика. Нагорното поместување на проекциите на ЕЦБ е умерено и причините главно се лоцираат кај цените на енергенсите и други фактори за коишто засега се смета дека имаат привремен карактер – рече Ангеловска-Бежоска.
Според неа, исклучително е важно што централните банки на големите економии, засега, за следниот период планираат да продолжат со олабавената монетарна политика, затоа што тоа е фактор што влијае врз случувањата на меѓународните финансиски пазари, коишто имаат влијание и врз цените на кредитирањето во нашата економија.
– За нас е многу важно што се случува на меѓународните финансиски пазари. Колку се тие порелаксирани, толку за нас има поголем простор за водење полабава монетарна политика. Тоа е прв предуслов, а какви ќе бидат каматните стапки кај нас зависи и од девизниот потенцијал на нашата економија, што засега е на сосема соодветно ниво според сите последно расположливи податоци и секако од инфлацијата, којашто зависи покрај од надворешни, и од домашни фактори, пред сѐ од домашната побарувачка – нагласи Ангеловска-Бежоска.
Во однос на актуелните трендови кај кредитната поддршка за населението, гувернерката посочи дека најзабележлив е растот кај станбените кредити од околу 13 отсто, додека има забавување кај потрошувачките кредити на околу 6 до 7 отсто, со што се гледа промена на структурата на кредитирањето.
Ангеловска-Бежоска рече дека растечкиот јавен долг е глобален феномен и резултат на фискалните пакети за поддршка на економиите, но ова уште повеќе ја нагласува потребата за натамошно мудро и рационално користење на јавните ресурси.
– Фискалните пакети треба да се насочени кон најранливите категории и кон расходи коишто не влијаат само на краток рок, туку коишто на долг рок го зголемуваат потенцијалот за раст на економијата, којшто би значел и поголеми буџетски приходи. Ова на среден рок ќе помогне за фискална консолидација. Исто така, за фискална консолидација важно е спроведувањето натамошни структурни реформи, од коишто зависи и каматната стапка на долгот, бидејќи од нив зависат и согледувањата на меѓународните инвеститори – нагласи гувернерката.