АЛБАНСКИОТ АМБАСАДОР ВО СКОПЈЕ ПРЕД ОТПОВИКУВАЊЕ? Јавно ги поддржал протестите за полагање правосуден испит на албански јазик

Амбасадорот на Албанија во Северна Македонија, Денјон Меидани, би можел предвреме да ја заврши својата дипломатска мисија во Скопје, објави албанската телевизија A2 CNN, повикувајќи се на извори од македонската престолнина и од албанското Министерство за надворешни работи.

Телевизијата наведува дека Меидани јавно покажал поддршка за албанските студенти и за барањата поврзани со полагањето на правосудниот испит на албански јазик.

Според истите извори, се разгледува можноста Меидани да биде именуван за амбасадор на Албанија во Косово, додека како можен нов амбасадор во Северна Македонија се споменува Петрит Малај.

Информациите засега не се официјално потврдени ниту од албанското Министерство за надворешни работи ниту од институциите во Скопје.

Амбасадорот на Албанија во Македонија, Денион Меидани, реагираше на социјалните мрежи во врска со задржувањата и доцнењата на студентите од Албанија на границата со Македонија, додека патувале за да го поддржат протестот за правото на употреба на албанскиот јазик на правосудниот испит.

Меидани истакна дека кога студентите се задржуваат, доцнат или се заплашуваат за време на мирно патување за граѓанска солидарност, прашањето повеќе не останува само процедурално, туку ја допира самата демократска суштина и европските вредности кон кои се стреми регионот.

Тој нагласи дека студентите не патувале за судири или тензии, туку за да поддржат едно елементарно барање – правото да бидат тестирани и да ја вршат професијата на својот мајчин јазик.