„АЛБАНЦИТЕ ПОВЕЌЕ НЕ СЕ ДЕКОР ВО ДРЖАВАТА“ Владиниот закон што ќе ја промени историјата е дело на Вреди

Коалицијата Вреди соопшти дека наредната недела на владина седница ќе биде донесен Законот за правична и соодветна застапеност на Албанците и другите заедници во јавната администрација, што според партијата претставува „историска правда“ и исполнување на суштинска точка од Охридскиот рамковен договор.

Од Вреди велат дека со оваа одлука ќе заврши ерата на институционална дискриминација која, според нив, траела три децении.

– Ова не е политичка реторика, туку историска корекција. Албанците не се повеќе декор во оваа држава, тие се нејзино јадро – порачаа од Вреди.

Партијата истакна дека законот се носи врз основа на Амандманот „VI“ од Уставот и оти ќе биде обврзувачки за сите институции, кои ќе мора да обезбедат фер застапеност со почитување на компетентноста, интегритетот, транспарентноста и инклузивноста.

– Она што ДУИ не го направи 22 години со сета власт на располагање, Вреди го прави во првите месеци од мандатот – велат од Коалицијата.

Од Вреди ја обвинија ДУИ дека „го продала Охридскиот договор за фотелји и позиции“, додека тие, како што велат, го враќаат достоинството и рамноправноста на Албанците во сите институции.

– Албанците отсекогаш заслужуваа да бидат во центарот на институциите, ние го спроведуваме тоа по закон – децидни се од Вреди.