АКО ПЕТКОВ НАПРАВИ ОТСТАПКИ КОН МАКЕДОНИЈА, ЌЕ ГИ ПОДДРЖИМЕ Борисов се изјасни за спорот меѓу Скопје и Софија

Ако бугарската Влада направи отстапки кон Северна Македонија и ги достави до Парламентот, ние сме подготвени да ги поддржиме, изјави поранешниот бугарски премиер и лидер на најголемата опозициска партија во земјата, Граѓани за европски развој на Бугарија (ГЕРБ), Бојко Борисов во интервју за најтиражниот бугарски весник „24 Часа“.

На прашањето дали планот предложен од новиот бугарски премиер Кирил Петков за формирање работни групи за дијалог со земјава би функционирал, Борисов вели дека може „само да му посака успех“ и „ако му треба поддршка, ќе му ја даде“.

Како што јави дописникот на МИА од Софија, Борисов во интервјуто потсетува дека неговата Владата го склучи Договорот за добрососедство со Северна Македонија, потег што го оценува како „огромен чекор напред“.

– За време на бугарското претседавање со ЕУ, имаше средби меѓу грчкиот и македонскиот премиер Алексис Ципрас и Зоран Заев, како и со (францускиот претседател Емануел) Макрон и други. Договорот од Преспа се роди во Софија, како можност по Договорот со Бугарија – потенцираше Борисов, говорејќи за постигнувањата на неговата Влада.

Според Борисов, тогаш на земјава ѝ било кажано дека има „две-три теми што треба да се решат – малцинствата, да се смени Уставот, да се разјасни историјата – и потоа да продолжи понатаму“.

– Бугарија во никој случај не ја запре Северна Македонија, тврди Борисов, додавајќи дека „не е можно да се влезе во ЕУ и да се внесат проблеми“, па затоа Софија „само ги успорила“ Скопје и Тирана.

Борисов во интервјуто нагласува и дека му посакува на новиот бугарски владин Кабинет да води добри преговори со земјава и ако неговата Влада нешто згрешила да го исправи тоа.

– За Бугарија ќе биде подобро Северна Македонија и Албанија да бидат дел од ЕУ, дециден е Борисов.