АКО ИМА ПАРИ ЗА ИЗМИСЛЕНОТО МИНИСТЕРСТВО НА ГРУБИ, МОРА ДА ИМА И ЗА СТУДЕНТИТЕ Студентскиот оброк ѝ го расипа апетитот на власта
Утрешниот протест на студентите пред Собранието е закажан за во 16 часот. Предлагачот ЛДП најави дека целосно ќе ги повлече измените на законот и ќе подготват нов текст во делот на критериумите, усогласен со предлозите на студентските организации, а Левица обвини дека од рекордниот буџет се скратени 140 милиони денари кои биле наменете за студентите.
Премиерот Димитар Ковачевски денеска порача дека студентите, кои за утре најавија протести пред Собранието, имаат право да се борат за своите права. Тој истакна дека за забелешките на студентите утре ќе има средба со ресорниот министер и оти е добро да се одржи собраниска седница на која ќе се дискутира за студентскиот стандард, како што иницира пратеникот од Демократскиот сојуз Павле Трајанов.
Според премиерот, важно е што има Закон за студентски оброк кој е поднесен во Собранието. Утре министерот за образование и наука Јетон Шаќири заедно со претставници на студентите ќе има состанок и со претставници на Парламентот, на различни парламентарни групи.
– Ќе имаат состанок во МОН каде ќе се разговара за забелешките на студентите во однос на предложеното законско решение. Дури и јас имам две забелешки, како ограничувачки фактори кои беа ставени, а сметам дека не треба да бидат и му ги кажав вчера на министерот за образование и наука – изјави Ковачевски по посетата на реконструираниот објект на полициската станица во Општина Гази Баба.
За барањето на пратеникот Павле Трајанов, премиерот Ковачевски смета дека е добро да има таква собраниска седница и најави дека сака и тој да присуствува на неа.
– Тука ќе можеме да го споредиме концептот. Трајанов е добар за таква седница бидејќи во времето кога беше во коалиција со премиерот Груевски, знаете како студентите беа тепани по плоштади и пред Владата. И ќе можеме да споредиме со тоа како студентите се третирани од 2017 година до денес. Таква собраниска седница би била одлична можност да можеме да споредиме во какви услови работеа студентите и можеа да ги искажат своите ставови пред и по 2017 година – истакна Ковачевски.
ЛДП ќе ги повлече предложените измени
Пратеничката и потпретседателка на ЛДП, Моника Зајкова, денеска негираше дека некој сака да го укине студентскиот оброк. Таа тврди дека се бара трајно и системско решение за оваа можност да функционира како што била првично замислена, а по моделот кој се применува во Словенија.
Таа додаде дека за да не се губи време во собраниските комисии ЛДП целосно ќе ги повлече измените на законот и ќе подготват нов текст во делот на критериумите, усогласен со предлозите на студентските организации.
– Реакциите на студентите се оправдани, тие бараат да се вратат критериумите кои важеа во решението од 2020 година. Но, за да може да бидат вклучени и слушнати изворни нивните предлози пред ова законско решение да влезе на расправа во комисиите, тие се поканети на средба во понеделник на која ќе бидат и предлагачите и министерот за образование. Доста е од популизам, доста е од искористување на сѐ и сешто за политички цели и поени, да го направиме законот системски применив и одржлив – рече Зајкова.
Таа потсети дека Законот за субвенциониран студентски оброк како иницијатива на ЛДП од 2018 година бил едногласно усвоен и од власта и од опозицијата уште во 2020 година, но Министерството за образование и наука не нашло можност системски да го имплементира. Поради тоа лани МОН решило да го менува на начинот што се исплаќале парите на трансакциските сметки на студентите без да се има увид дали тие се трошат за храна или за други намени.
– Како компромис поради реакција на младинскиот сектор и универзитетското собрание се воведе преодна одредба во постоечкиот закон која важеше до почетокот на оваа студиска година. Измените на законот го нарушија целиот концепт на истиот и го сведоа на ниво на финансиска поддршка. Бидејќи и по цела година од страна на Министерство за образование и наука не беше воспоставен систем за имплементација, а преодната одредба истече се соочивме со вакуум период односно период кога студентите не ја користат мерката поради законска празнина – рече Зајкова.
Левица го поддржува протестот на студентите
Левица обвини дека власта скратила 140 милиони денари од буџетот кои биле наменети за студентите, во ставката „Студентски стандард“.
– Откако студентите најавија протести против укинувањето на субвенционираниот студентски оброк, предлагачот Моника Зајкова од ЛДП ретерираше и најави повлекување на предлогот. Нејзината изјава дека се повлекува законот е манипулативна, затоа што, според Зајкова, испаѓа дека таа не ни знаела каков предлог-закон поднесува – велат од Левица.
Иако за утре е закажана средба на МОН со Студентското собрание, тоа што во предлог-буџетот се скратени 140 милиони денари од студентите, според Левица, јасно дава до знаење дека власта со разни акробации повторно ќе штеди врз грбот на студентите.
– Токму СДС во предизборие најавуваше кратење на министерствата до 20 министерства и укинување на патните трошоци, со цел рационализирање на трошењето народни пари. Наместо тоа, пет години подоцна, СДС воведе ново измислено Министерство за Артан Груби и гласаше против предлог-законот на Левица за намалување на патни трошоци на пратениците – се наведува со реакцијата на Левица, која го поддржува утрешниот протест на студентите пред Собранието, закажан за во 16 часот.