„АКО ИМА НОВО БУГАРСКО ВЕТО, ДА ГИ ПРЕКИНЕМЕ ПРЕГОВОРИТЕ“ Филипче предлага резолуција со црвени линии како заштитен механизам
Ајде тогаш да донесеме заедничка резолуција наша во Собранието, во која ќе ги кажеме нашите црвени линии. Еве ако тоа се случи ново вето, да ги прекинеме преговорите со ЕУ, предлага лидерот на СДСМ притоа велејќи дека во услови кога нема подобар предлог од францускиот предлог потребен е механизам за заштита на државните интереси.
Претседателот на СДСМ, Венко Филипче, во интервју за Сител изјави дека смета дека Владата води неискрена политика во однос на европските интеграции и свесно го пролонгира процесот без визија и без храброст.
Според лидерот на СДСМ францускиот предлог бил прифатен во отсуство на подобра опција „и ни беше јасно дека друга шанса нема да имаме“.
Првиот човек на СДСМ тврди дека и самата ВМРО-ДПМНЕ, и во критиките, и во ветувањата, знае дека „друга опција нема, а токму на тоа, како што рече, ја добија и довербата лани“.
Филипче вели дека СДСМ дава бланко поддршка ако се издејствуваат подобри услови. Но, според лидерот на СДСМ, откако тие услови не доаѓаат, државата не смее бесцелно да чека. Наместо тоа, вели тој, СДСМ предлага конкретен механизам за заштита на државните интереси:
– Ајде тогаш да донесеме заедничка резолуција наша во Собранието, во која ќе ги кажеме нашите црвени линии. Еве ако тоа се случи ново вето, да ги прекинеме преговорите со ЕУ – предлага Филипче.
Филипче смета дека Македонија губи време и можности и дека младите гледаат застој и тоа директно влијае на нивната одлука да ја напуштат државата.
Според лидерот на СДСМ иако ВМРО-ДПМНЕ тврди дека прашањето на ЕУ не е приоритет, истражувањата покажуваат спротивно:
– Огромна поддршка има и кај Македонците, и кај Албанците. Не смееме тоа да го занемариме. Сметам дека се губи време. Сите се свесни дека ние подобар предлог нема да добиеме и ја охрабрувам Владата да каже до кога ќе се обидува – заклучи Филипче.