Ахмети: Сега потребна ни е победа над вирусот, а не изборна победа
Од ДУИ за Плусинфо потврдија дека средба на лидерите за одложување на изборите ќе има денес или најдоцна утре. Можно е лидерската средба да се одржи веднаш по седницата на Советот за безбедност
Лидерот на ДУИ Али Ахмети е за победа над вирусот, а не на изборите. Ова сублимирано е позицијата на ДУИ која се чита во насока дека изборите на 12 април ќе се одложат, а за ова се очекува веќе денеска или утре да се свика лидерска средба.
Од ДУИ за Плусинфо потврдија дека средба на лидерите за одложување на изборите ќе има денес или најдоцна утре. Можно е лидерската средба да се одржи веднаш по седницата на Советот за безбедност.
– Апсолутен приоритет на сите нас се граѓаните и јавно здравје. Изборите и кампањите се последното прашање на нашата агенда и приоритети, затоа што ги ставивме сите наши човечки, интелектуални, институционални капацитети во првите редови на нашата заедничка битка против вирусот. Сега, потребна ни е победа на вирусот, а не изборна победа. Ќе се справиме со изборите и кампањата, откако ќе ја надминеме оваа закана за сите нас и заедно ќе ве увериме дека можеме. Целосно сме посветени на решавање на ситуацијата со Ковид-19 и помагање на граѓаните, лекарите и економијата. На прво место е здравјето – вели Ахмети во својот пост на Фејсбук.
И од Алијансата за Албанците велат дека на прво место им е здравјето на граѓаните.
– Со надеж дека заедно ќе ја надминеме на најлесен пат оваа необична ситуација почитувајќи ги препораките и наредбите на Светската здравствена организација, а и препораките на надлежните институции во земјава, за заедно да го спречиме ширењето на вирусот Ковид-19. Како политички субјект сме свесни и одговорни за создадената ситуација, така што нашиот став за предвремеите избори ќе биде во согласност со фактичката реаност имајќи ги предвид сугестиите на надлежните и на релевантните иснтитуции кои се покомпетентни во нивните проценки дали треба да се одржат изборите или истите да се пролонгираат на одреден временски рок – велат од партијата на Зијадин Села.
Според Алијансата, лидерите на најголемите партии треба да одлучат дали да се одржат или одложат изборите.
И од Беса за Плусинфо потврдија дека се за одложување на изборите.
Претходно одчложување на изборите побараа и лидерите на најголемите македонски партии ВМРО-ДПМНЕ и СДСМ, Христијан Мицкоски и Зоран Заев.