Џафери ја врати на поправка интерпелацијата од Левица против него, не била со уставното име
Спикерот Талат Џафери нема храброст да се соочи со пратениците и ја враќа интерпелацијата против него! Член 136 кој тука е наведен, се однесува на општи прекршувања на Деловникот. Џафери нема наведено ништо конкретно зошто интерпелацијата е вратена, вели Крмов.
Претседателот на Собранието, Талат Џафери, ја врати на корекција интерпелацијата поднесена од Левица против него, објави на Фејсбук пратеникот Борислав Крмов.
Џафери ја вратил интерпелацијата повикувајќи се на членот 136 од Деловникот на Собранието. Според информации од Парламентот, интерпелацијата е вратена бидејќи подносителот, во случајов партијата Левица, не го користела уставното име на државата.
„Спикерот Талат Џафери нема храброст да се соочи со пратениците и ја враќа интерпелацијата против него! Член 136 кој тука е наведен, се однесува на општи прекршувања на Деловникот. Џафери нема наведено ништо конкретно зошто интерпелацијата е вратена. Подолу дури изигрува обвинител и Уставен суд, па ‘суди‘ што било во согласност со позитивното право на РМ, а што не. Иако тоа не е негова работа. И секако, продолжува со дискриминација на пратениците (не) Албанци форсирајќи двојазични документи по секоја цена. Оти му се може. А премиерот со прстот во уста. Битно парата се врти“, напиша Крмов на Фејсбук.
Во членот 136 од Деловникот се вели: „Ако предлогот на закон не е подготвен во согласност со одредбите на овој Деловник, претседателот на Собранието, пред да го достави на пратениците, ќе побара од предлагачот да го усогласи со одредбите на овој Деловник. Ако предлагачот не го дополни предлогот на законот во рок од 15 дена од барањето на претседателот на Собранието се смета дека предлогот на законот не е поднесен“.
Од Собранието велат дека станува збор за неусогласеност на Интерпелацијата со уставното име на државата.
Левица и ВМРО-ДПМНЕ поднесоа интерпелација до претседателот на Собранието, Талат Џафери, бидејќи тој во Европскиот парламент се обрати на албански јазик. Премиерот Зоран Заев неодамна изјави дека Џафери го прекршил Уставот ама дека СДСМ нема да гласа за негово разрешување од функцијата претседател на Парламентот, туку дека чека тој да објасни зошто го прекршил Уставот.
Џафери, пак, се изјасни дека не го повредил Уставот со тоа што се обратил на албански јазик, односно дека говорел на јазикот кој најдобро го познавал.