АЕРОДРОМ СТАВА КРАЈ НА ЗАГАДУВАЧИТЕ Забранети асфалтни бази на целата територија

Советот на Општина Аеродром на последната седница донесе одлука со која се воведува целосна забрана за планирање и изградба на асфалтни и бетонски бази на територијата на општината. Иницијативата доаѓа од в. д. градоначалникот Дејан Митески, кој изјави дека оваа мерка е клучна за заштита на животната средина и здравјето на граѓаните.

– Ова е црвена линија што ја повлекуваме во името на сите генерации што живеат и ќе живеат во Општина Аеродром, која е пример за модерно, еколошко и одговорно урбано живеење – изјави Митески.

Со новата одлука, се укинува можноста за предвидување асфалтни или бетонски бази во урбанистичките планови, како и изградба на погони за градежни производи кои претставуваат ризик за животната средина.

Од Општината потенцираат дека здравјето и квалитетот на животот на граѓаните се приоритет и оти оваа забрана е дел од нивната стратегија за здрава, зелена и безбедна општина.