ЈА ИЗЛАЖАЛЕ ДЕКА ЌЕРКА Ѝ Е ТЕШКО ПОВРЕДЕНА ВО СООБРАЌАЈКА 74-годишна охриѓанка му дала 3.000 евра на измамникот
Според пријавеното, на едно лице кое дошло пред нејзиниот дом, охриѓанката му дала околу 3.000 евра, информираше прес-службата на СВР-Охрид.
Во текот на вчерашниот ден, 74-годишна жителка на Охрид, во СВР Охрид пријавила дека околу 13 часот, телефонски добила известување за сообраќајна несреќа во која, наводно, била тешко повредена нејзината ќерка и дека итно ѝ биле потребни пари за помош и исплата на оштета. Според пријавеното, на едно лице кое дошло пред нејзиниот дом, таа му дала околу 3.000 евра, информираше прес-службата на СВР-Охрид.
Истиот ден, додаваат оттаму, во СВР Охрид е пријавено дека повозрасна жителка од охридско село била измамена од едно лице, кое ѝ побарало и добило 300 евра, поради наводен долг на нејзиниот син кој живее во странство.
„Секторот за внатрешни работи Охрид апелира до граѓаните да бидат претпазливи во комуникацијата со непознати лица и да не наседнуваат на вакви и слични измами, да не им даваат пари на измамниците и сите сомнителни случаи веднаш да ги пријават во најблиската полициска станица или на бесплатниот телефонски број 112. СВР Охрид работи на расчистување на пријавените случаи и пронаоѓање на сторителите по што ќе поднесе соодветни пријави“, се вели во соопштението.