„Аџибадем Систина“ располага со лекот „ивермектин“

Клиничката болница „Аџибадем Систина“ го има на располагање лекот „ивермектин“ за пациентите кои се лекуваат од ковид-19 во ковид-центарот на болницата и за пациентите кои се хоспитализирани, дознава Плусинфо.

Иако беше најавено дека од вчера лекот ќе го има во аптеките, како што сведочат граѓани преку медиумите и социјалните мрежи, лекот тешко се наоѓа и сѐ уште го нема во сите аптеки. „Ивермектинот“ не е на позитивната листа на лекови кои потпаѓаат на товар на Фондот за здравство. Согласно Решението на МАЛМЕД лекот се издава исклучиво на рецепт и се применуваат одредбите за издавање на розев рецепт. Цената што ја одреди МАЛМЕД за лекот изнесува 299 денари.

Директорот на Агенцијата за лекови и медицински средства (МАЛМЕД), Љирим Шабани, во понеделникот информираше дека лекот „ивермектин“ е стигнат во земјава.

– Студиите покажаа дека „ивермектинот“ се дава на три групи граѓани и тоа, кај ризичните групи на работници, кои имаат висок ризик да заболат, потоа на луѓе, кои биле во контакт со заболен и на заболени пациенти. И кај трите групи има различни индикации, различно дозирање и затоа е потребно давањето на лекот да биде под контрола на лекар – изјави министерот за здравство, Венко Филипче минатата недела.

Матичните лекари вчера добиле протоколи за употребата на лекот „ивермектин“ кај пациенти со ковид-19, изработени од стручниот колегиум за ЈЗУ Универзитетска клиника за пулмологија и алергологија и центрите за ковид-19.

Министерството за здравство потенцира дека „ивермектинот“ е антипаразитски лек со широк спектар на делување, неговата примена треба да биде исклучиво под лекарски надзор без разлика дали станува збор за домашно лекување или хоспитализација.

– Апелираме граѓаните на своја рака да не го пијат лекот „ивермектин“, бидејќи единствено лекар може да утврди дали постојат индикации за користење на лекот и доколку постојат во која доза и во комбинација со кои други лекови може да се користи „ивермектинот“ – нагласија од Министерството за здравство.