ГЕВГЕЛИЧАНЕЦ ЗАРАБОТИЛ 4,2 МИЛИОНИ ЕВРА ОД ПЛАТИ И ДИВИДЕНДИ! УЈП објави податоци за приходите на граѓаните во 2025 година

Граѓанин од Гевгелија во 2025 година остварил вкупен доход од 257,5 милиони денари, односно околу 4,2 милиони евра, преку плата, дивиденда и други извори на приходи. Веднаш зад него е граѓанин од Охрид, со годишен доход од 254,4 милиони денари. Ова го покажуваат податоците што денеска ги објави Управата за јавни приходи (УЈП), откривајќи големи разлики во приходите на граѓаните.

Според УЈП, највисоката поединечна годишна бруто-плата во државата изнесувала 139,1 милион денари, што е приближно 2,26 милиони евра. Тоа одговара на просек од околу 11,6 милиони денари месечно, односно речиси 189.000 евра бруто месечно. Највисоката исплатена дивиденда изнесувала 252,6 милиони денари, највисоката капитална добивка 164,2 милиони денари, додека најголемиот доход од самостојна дејност достигнал 157,9 милиони денари.

Во текот на 2025 година, 31 граѓанин остварил годишен доход поголем од 100 милиони денари. Нивниот заеднички доход изнесувал 4,973 милијарди денари, односно околу 80,9 милиони евра. За споредба, во 2024 година во оваа категорија имало 42 граѓани, со вкупен доход од 6,753 милијарди денари.

УЈП изготвила претпополнети годишни даночни пријави за околу 863.000 граѓани, кои заедно оствариле бруто-доход од 612,9 милијарди денари. Пресметаниот данок на личен доход изнесувал околу 39,8 милијарди денари. Во однос на претходната година, бројот на граѓани со оданочив доход се зголемил за 82.702, а вкупниот доход и пресметаниот данок пораснале за околу 14 проценти.

Најголемата група, од околу 638.000 граѓани, остварила годишен бруто-доход меѓу 100.000 и еден милион денари. Оваа група учествува со 55 проценти во вкупниот доход, додека 16 проценти од даночните обврзници, со годишен доход меѓу еден и десет милиони денари, оствариле 39 проценти од вкупниот доход.

Најголем дел од приходите на граѓаните, околу две третини, потекнуваат од плати. Пензиите учествуваат со 9,5 проценти, а другите лични примања од работа со 8,2 проценти. Плата оствариле околу 596.000 граѓани, дивиденди добиле 33.000 лица, приходи од закупнини имале околу 33.000, а 114.000 граѓани оствариле добивки од игри на среќа.

Регионалните податоци покажуваат дека Скопје учествува со 36 проценти во бројот на годишните даночни пријави, но со 43 проценти во вкупниот остварен бруто-доход. Просечниот годишен доход по пријава во Скопје изнесува 846.000 денари, што е највисок просек меѓу регионите.

Од УЈП посочуваат дека податоците ќе се користат за подобро следење на даночните политики, откривање можни неправилности во пријавувањето на доходот и поефикасно насочување на даночните контроли.