НЕЈМАР ГО ИСПРАТИ МЕСИ ПРЕД ПОСЛЕДНОТО ЗБОГУВАЊЕ „Не е само Аргентина, ти благодари целиот свет!“
Бразилецот му порача на својот голем пријател дека целиот фудбалски свет уживал во него сите овие години. Беше огромна чест да играм против тебе, а уште поголема да пишувам историја покрај тебе, напиша Нејмар.
Нејмар испрати емотивна порака до Лионел Меси пред неговиот последен натпревар за Аргентина. Поранешниот соиграч му порача дека благодарноста одамна ги надминала границите на неговата земја.
„Секој што го сака фудбалот уживаше во тебе сите овие години. Денес е твојот последен натпревар во дресот на твојата репрезентација, на твојата земја. Се надевам дека ќе уживаш во секоја секунда и дека сите почести што ќе ги добиеш ќе те направат среќен“, напиша Нејмар.
Најсилната порака ја остави за крајот на збогувањето.
„Не ти благодари само Аргентина, ти благодари целиот свет за сè што направи за фудбалот“, порача бразилскиот ас.
Quem ama futebol te aproveitou ao longo desses anos…
Hoje é seu ultimo jogo com a camisa da tua seleção, do teu país e eu espero que você curta cada segundo, que todas as homenagens hoje te façam feliz.
Não é só Argentina que te agradece, o mundo agradece por tudo que fez ao futebol.
Obrigado por me fazer amar ainda mais o futebol, foi uma honra ter jogado contra você e mais ainda fazer história ao seu lado.
GRACIAS Leo Messi 🐐— Neymar Jr (@neymarjr) October 6, 2026
Меси и Нејмар со години беа ривали во дресовите на Аргентина и на Бразил. Но, нивното пријателство се градеше токму додека заедно испишуваа фудбалска историја.
Двајцата играа заедно во Барселона, каде што со Луис Суарез го формираа славното трио МСН. Патиштата повторно им се споија во ПСЖ.
Нејмар во пораката се наврати токму на годините поминати покрај Меси.
„Ти благодарам што ме натера уште повеќе да го засакам фудбалот. Беше огромна чест да играм против тебе, а уште поголема да пишувам историја покрај тебе. БЛАГОДАРАМ, Лео Меси“, напиша Нејмар.
Меси вечерва против Бенин на „Монументал“ во Буенос Аирес го игра последниот натпревар за Аргентина. АФА го нарече збогувањето „Последното танго“, а околу 85.000 билети за историската вечер биле распродадени за само час ипол.
Аргентинскиот капитен заминува по 21 година во националниот дрес, со 125 гола на 207 натпревари пред вечерашниот последен настап. За збогувањето е подготвен и специјален небесносин-бел дрес со златни детали, меѓу кои и неговата легендарна „десетка“.