ТИЕ НИКОГАШ НЕ СЕ ГРИЖАТ ДАЛИ ГО ЗАБОРАВИЛЕ ПАСОШОТ Само тројца луѓе во светот можат да патуваат без него

Пасошот е еден од оние документи без кои повеќето луѓе не можат ниту да замислат патување во странство. Пред да тргнат кон аеродромот, повеќето патници уште еднаш ќе проверат дали документот им е на место.

Сепак, за тројца луѓе во светот оваа грижа воопшто не постои. Тие ги преминуваат меѓународните граници без пасош, а причината лежи во нивната уставна и протоколарна положба.

Оваа посебна привилегија важи за британскиот крал Чарлс III, како и за јапонскиот царски пар – царот Нарухито и царицата Масако.

Причината поради која на кралот Чарлс III не му е потребен овој документ е прилично едноставна, но целосно протоколарна.

Британските пасоши се издаваат во име на монархот. Бидејќи токму тој е лицето во чие име се издава документот, официјалниот став на британското кралско семејство е дека нема потреба самиот монарх да поседува пасош.

Додека секој британски граѓанин пред патување мора да има важечка патна исправа, кралот ја нема таа законска обврска.

Сепак, овој посебен статус не значи дека Чарлс III може едноставно да ја премине границата без какви било претходни процедури.

Кога патува надвор од земјата, неговото пристигнување однапред се усогласува по дипломатски пат со земјата домаќин. Британскиот министер за надворешни работи официјално бара да му биде овозможено непречено минување, како и целата потребна помош и заштита за време на неговиот престој.

Интересно е што ова правило важи исклучиво за актуелниот монарх.

Сите останати членови на кралското семејство, вклучително и кралицата Камила и принцот Вилијам, имаат редовни британски пасоши и мора да ги користат при патувања во странство.

Покрај тоа што е британски монарх, Чарлс III е и шеф на државата во уште 14 земји од Комонвелтот, меѓу кои се Канада, Австралија, Нов Зеланд, Јамајка и други.

Покрај британскиот крал, без пасош патуваат и јапонскиот цар Нарухито и неговата сопруга, царицата Масако.

Нивниот посебен статус произлегува од официјална одлука на јапонското Министерство за надворешни работи донесена уште во 1971 година.

Тогашниот престолонаследник требало да отпатува во Европа, а јапонските власти заклучиле дека би било целосно несоодветно на царот да му биде издаден обичен или дипломатски пасош, како и од него да се бара да ги поминува стандардните процедури за издавање документи и визи.

Практиката воспоставена тогаш се задржала до денес и подеднакво важи за царот и царицата.

Секако, тоа не значи дека јапонскиот царски пар може ненајавено да се качи во авион и да се појави на која било дестинација.

Секое нивно патување детално се договара преку дипломатски канали меѓу Јапонија и државата во која патуваат.

Јапонската влада официјално ја најавува посетата и навреме им ги доставува на надлежните органи на земјата домаќин сите потребни податоци и документација.