ПОЖАРНИКАРИТЕ СПАСИЈА ТЕЛЕ ОД ПОЖАРОТ НА КИТКА Директорот на ЦУК апелира на максимална внимателност
Пожарите не ја загрозуваат само природата, имотот и животите на луѓето, загрозени се и животните, кои често остануваат беспомошни пред огнената стихија и затоа апелирам на максимална одговорност, вели директорот на Центарот за управување со кризи, Мухамед Али.
Скопските пожарникари спасија теле од пожарот над селото Палиград, информираше директорот на Центарот за управување со кризи, Мухамед Али.
– Вчера додека бев на лице место на големиот пожар над селото Палиград, на планината Китка, покрај тешката борба со пожарот имавме и една несекојдневна и убава случка. Во метежот и огнот, пожарникарите од Противпожарната бригада на Град Скопје успеаја да спасат едно мало теле кое останало на опожарениот терен. Мало, исплашено, но живо – една мала победа во тешкиот ден – изјави Али.
Во вакви моменти, секој спасен живот е важен, а меѓу огнот и пепелта, успеавме да спасиме и едно мало суштество, додаде тој.
– За жал, пожарите не ја загрозуваат само природата, имотот и животите на луѓето. Загрозени се и животните, кои често остануваат беспомошни пред огнената стихија. Затоа, апелирам на максимална одговорност и внимателност. Пожарите, без разлика дали се подметнати или избувнуваат поради невнимание, оставаат последици врз сите живи суштества. Да ја чуваме природата, да ги заштитиме луѓето, имотот и животните – апелира директорот на ЦУК.