БЕРЛИН ВОЈУВА СО БРИСЕЛ ОКОЛУ ГРАНИЦИТЕ Германија одлучи да ги продолжи контролите уште шест месеци

Германија официјално ја известила Европската комисија дека ги продолжува привремените контроли на сите свои копнени граници, вклучително и границата со Холандија, за дополнителни шест месеци.

Сегашната фаза на контролите требаше да заврши на 15 септември 2026 година, но сега ќе остане во сила до средината на март 2027 година, објавува холандскиот јавен сервис НОС.

Контролите се спроведуваат на сите девет германски копнени граници – кон Холандија, Белгија, Луксембург, Франција, Данска, Полска, Чешка, Австрија и Швајцарија.

Иако границите не се затворени, германската федерална полиција спроведува стационарни и мобилни контроли, при што запира возила и ги проверува документите на патниците.

Одлуката предизвика остри критики, особено во регионите долж германско-холандската граница.

Стационарните контролни пунктови доведоа до постојани сообраќајни колони на важни товарни и транзитни правци, што значително го забавува движењето на возилата.

Општините од холандската страна на границата тврдат дека овие колони довеле и до неколку сериозни сообраќајни несреќи.

Само на холандската страна на границата, најмалку четири лица загинале, а повеќе од десет се повредени во инциденти кои, според локалните власти, директно се поврзани со сообраќајните колони создадени поради граничните контроли.

Пограничните градови и локалните власти остро протестираат против продолжувањето на контролите.

Градоначалникот на Депортихем побарал нивно итно укинување, додека градоначалникот на Најмеген состојбата во сообраќајот на границата ја опишал како „целосен хаос“.

Продолжувањето на контролите директно ги доведува во прашање принципите на единствениот пазар на Европската Унија и слободното движење во рамките на Шенген-зоната.

Според Шенгенскиот договор, контролите на внатрешните граници треба да претставуваат крајна мерка и се дозволени само во случаи на „сериозна закана за јавниот ред или внатрешната безбедност“.

Европската комисија неодамна повика повеќе земји членки, меѓу кои Германија и Франција, постепено да ги укинат привремените контроли на внатрешните граници.

Во Брисел сметаат дека случајните проверки и напредните системи за управување со податоци, како што е Системот за влез/излез (EES), можат да бидат доволни за управување со безбедносните ризици без да се загрози слободата на движење.

И покрај притисокот од Европската комисија, Берлин одлучил приоритет да ѝ даде на својата политика на внатрешна безбедност.

Така, контролите на германските копнени граници ќе продолжат најмалку до март 2027 година, што значи дека патниците и превозниците и во наредните месеци можат да очекуваат проверки, запирања и можни сообраќајни колони на границите.