АПСЕЊА ОТКАКО СЕ УДАВИ 5-ГОДИШНО ДЕТЕ ВО АКВАПАРКОТ ВО СМЕДЕРЕВО Мајката дошла со 6 деца, удавеното дете на момент го изгубила од видокругот

По давењето на 5-годишно дете, полицијата во Смедерево, Србија, по наредба на вишиот јавен обвинител, ги уапси одговорните лица на компанијата што управува со аквапаркот во градот, М. Ѓ. (36) и Д. Ѓ. (44), како и спасителот Б.Р. (52), поради основи на сомнение дека сториле кривично дело Тешки кривични дела против општата безбедност во врска со кривичното дело Предизвикување општа опасност, соопшти српското министерство за внатрешни работи.

Сомневањата се дека тие не постапиле според прописите и техничките правила за мерките за заштита во аква паркот, каде што на 20 јули годинава се удави 5-годишното дете. Неправилностите и пропустите во работата се утврдени со оперативна истрага во соработка со Републичката спортска инспекција.

По наредба на вишиот јавен обвинител, осомничените се задржани до 48 часа, по што ќе бидат донесени во обвинителството со кривична пријава.

Петгодишното момче се удави на 20 јули во аквапаркот „Југово“ во Смедерево.

Екипите за итни случаи веднаш биле испратени на местото на настанот, и заедно со спасувачите се обиделе да го реанимираат. Лекарите цел час безуспешно се обидувале да го реанимираат детето.

– Лекарот за итни случаи го носеше во раце, било страшно да се види – им изјави еден од присутните на српските медиуми.

Аквапаркот „Југово“ по несреќата објави дека нема да биде отворен до понатамошно известување.

Како што објавија медиумите, детето во еден момент исчезнало од видното поле на родителите. Набрзо било пронајдено во водата, по што било извлечено од базенот.

Според очевидците, мајката дошла на базенот со шест деца, а таткото набрзо им се придружил. Малите безгрижно си играле и пливале во детскиот базен, кога за секунда сè се претворило во пекол.