ИРАН ПОДГОТВУВА НОВ ШОК ЗА СВЕТОТ Планира да затвори уште еден важен проток на енергенси

Иран побарал од јеменските Хути да бидат подготвени да го затворат протокот Баб ел-Мандеб, клучен влез во Црвеното Море, доколку САД ја нападнат енергетската инфраструктура на Иран.

Таквиот потег, по затворањето на Ормускиот Проток, би можел сериозно да го загрози глобалното снабдување со енергија.

Според двајца високи ирански функционери и регионален извор запознаен со ситуацијата, можноста за затворање на морскиот коридор веќе се дискутира во рамките на иранското раководство.

Пораката за тревога им била пренесена на Хутите во последните денови, иако не е познато дали ова е направено пред или откако американскиот претседател Доналд Трамп се закани дека ќе ги нападне енергетските капацитети на Иран.

Изворите тврдат дека Хутите веќе ги завршиле воените подготовки. Според извор близок до групата, тие распоредиле ракети и беспилотни летала во близина на протокот Баб ел-Мандеб, кој ги поврзува Црвеното Море и Аденскиот Залив, и чекаат наредба да почнат да ги напаѓаат бродовите. Се претпоставува дека  конечната одлука за затворање на протокот ќе ја донесат членовите на Иранската револуционерна гарда (ИРГЦ), кои веќе се во Јемен.

Аналитичарите предупредуваат дека истовремената блокада на двата протока би предизвикала една од најголемите енергетски кризи во поновата историја.

Откако Иран го затвори Ормускиот Проток, Саудиска Арабија пренасочи дел од својот извоз на нафта кон своето пристаниште Јанбу на Црвеното Море. Денес, околу седум проценти од светските резерви на енергија минуваат низ таа поморска рута, па затоа неговото затворање дополнително би го потресло глобалниот пазар.

Два извори блиски до саудиските власти изјавија дека Ријад ги сфаќа заканите од Иран и Хутите многу сериозно и верува дека Хутите сега дејствуваат во уште потесна координација со Техеран.

Хутите веќе нападнаа трговски бродови во Црвеното Море за време на војната во Газа, принудувајќи многу бродски компании да го пренасочат сообраќајот околу ’Ртот Добра Надеж во јужна Африка, што значително ги зголеми трошоците и времето на испорака.