🎥 ДУА ЛИПА ГИ ПОДДРЖА ПРОТЕСТИТЕ ВО АЛБАНИЈА Пејачката изрази восхит за „фламинго револуцијата“ против одморалиштето поддржано од семејството Трамп

Албанската „фламинго револуција“ го доби својот најзначаен поддржувач досега откако поп-ѕвездата Дуа Липа изрази восхит за протестите против одморалиштето поддржано од семејството Трамп во Албанија

Родена во Лондон од албански родители во 1995 година, Дуа (чие име значи „љубов“ на албански) се искачи од тинејџерски преработки на Јутјуб до една од најголемите светски поп-артисти. Со хитови како „Levitating“, „Don’t Start Now“ и „New Rules“, таа собра Греми награди, милијарди стримови и следбеници во светот на модата што ја прави културен амбасадор на Албанија. Таа гордо го мавта албанското знаме на концерти, го посетува семејството на Косово и претходно ја користела својата платформа за да ги истакне балканските прашања. За публиката што се занимава со политика на ЕУ, повеќе запознаена со европратениците отколку со оние што се на врвот на топ листите, замислете ја како харизматичен еквивалент на влијателна личност со голема моќ, чиј дострел ги засенува повеќето политичари, пишуваат медиумите.

Протестите се насочени против проектот за изградба на голем туристички комплекс што опфаќа делови од островот Сазан, единствениот остров на Албанија, како и изградба на дополнителни 10.000 вили долж песочниот брег на полуостровот Звернец.

Проектот е поддржан од инвеститори предводени од Џаред Кушнер, зетот на американскиот претседател Доналд Трамп, и неговата сопруга Иванка Трамп. Самата Иванка Трамп претходно го опиша планираното одморалиште како огромен и убав проект.

Идејата за изградбата беше забрзана откако албанскиот парламент во декември 2024 година направи измени во строгите закони за заштита на животната средина, со што беше овозможена градба во чувствителни природни подрачја. Нема докази дека Кушнер имал каква било улога во донесувањето на овие измени.

Токму оваа одлука на властите предизвика загриженост кај Липа, која смета дека се отвора прашањето за транспарентноста на институциите.

– Она што мене навистина ме загрижува е принципот според кој владата може едноставно да го смени законот и да ја отстрани заштитата на животната средина без каква било јавна консултација – рече таа.

Островот Сазан и полуостровот Звернец во моментов се ненаселени подрачја и се сметаат за природни резервати со важни екосистеми, живеалишта за птици и други ретки видови во Јадранското Море.

Европратениците предупредија дека Албанија, која е кандидат за членство во Европската Унија, може да се соочи со проблеми во пристапните преговори доколку не ги почитува европските стандарди за заштита на животната средина.

Изјавата на Дуа Липа беше поздравена од учесниците на протестите во Тирана, а Александар Трајче, раководител на водечката албанска организација за заштита на природата, изјави дека зборовите на пејачката дошле во вистински момент.

Инвеститорите, пак, и покрај протестите, порачаа дека проектот ќе продолжи со одговорен пристап, со фокус на заштита на природата, создавање работни места и долгорочна корист за локалните заедници.