📽️ ЦИПРАС ПАК ЌЕ ИГРА ВО ПОЛИТИКАТА Новата партија ќе го престигне ПАСОК?
Поранешниот грчки премиер Алексис Ципрас официјално најави дека на 26 мај ќе ја претстави својата нова политичка партија. Грчките медиуми оценуваат дека неговото враќање дополнително ќе ја разбранува опозицијата и може сериозно да влијае врз ПАСОК и Сириза.
Со видео со броевите 26 и 5 поранешниот премиер на Грција, Алексис Ципрас, најави враќање во активната политика со формирање нова партија.
Според „Прототема“, официјалното претставување е закажано за 26 мај.
„Ниту прерано ниту предоцна, сега е време“, порача поранешниот грчки премиер под видеото.
На снимката се појавуваат две момчиња на фудбалски терен со дресови со броевите „26“ и „5“. Тоа симболично го најавува датумот на промоцијата.
Поддржувачите го повикувале да се врати
Грчките медиуми пишуваат дека во изминатите денови на социјалните мрежи биле објавувани видеа од негови поддржувачи кои барале Ципрас повторно да се активира политички.
Во пораките се велело дека „во март било прерано“, а дека „во септември ќе биде предоцна“.
Ούτε νωρίς ούτε αργά,
τώρα είναι η ώρα. pic.twitter.com/glgqSsKLlO— Αλέξης Τσίπρας – Alexis Tsipras (@atsipras) May 18, 2026
Проблем за ПАСОК и Сириза?
Според грчките медиуми, новото позиционирање на Ципрас дополнително ги комплицира односите во опозицискиот блок.
Некои анкети покажуваат дека Ципрас има поголема поддршка од лидерот на ПАСОК, Никос Андрулакис.
Постојат и проценки дека неговата нова партија би можела да го престигне ПАСОК.
Се појавува и ново политичко движење
Во фокусот на грчката јавност е и политичкото активирање на Марија Каристијану, поранешната претседателка на Здружението на семејствата на жртвите од железничката несреќа во Темпа.
Таа оваа недела во Солун ќе ја претстави основачката декларација на својата партија.
Според анкетите, Каристијану привлекува гласачи од различни политички ориентации, како и млади кои традиционално не излегуваат на избори.