ПАЗАРНИТЕ ИНСПЕКТОРИ ТРГНАА ВО КОНТРОЛА НА ТРГОВЦИТЕ СО ВЕШТАЧКИ ЃУБРИВА Ќе се контролира дали ги применуваат ограничените маржи

Државниот пазарен инспекторат најавува засилени инспекциски контроли на работењето на трговците со вештачки ѓубрива по одлуката на владата за ограничување на маржите и за континуирано снабдување со производот кои ќе се применуваат до 31 мај годинава.

– Контролите ќе бидат насочени кон доследна примена на утврдените мерки на владата и тоа: како највисоки цени на залихите во трговијата на големо на неоргански ѓубрива се утврдуваат цените што се применувале во трговијата на големо на 15 април 2026 година, намалени за 10%; се ограничува највисоката бруто-профитна маржа во трговијата на големо и мало на неорганските ѓубрива до 5%; се ограничува највисоката бруто-профитна маржа во трговијата на големо и мало на органските ѓубрива, органо-минералните ѓубрива, биостимулаторите и подобрувачите на својствата на почвата до 10% – велат од Пазарниот инспекторат.

Како што е соопштено, ќе се контролира и обврската за континуирано снабдување на пазарот со вештачки ѓубрива.

-Трговците на мало се должни месечно да обезбедуваат и продаваат најмалку 70% од просечната количина што ја набавиле во 2026 година, додека трговците на големо се обврзуваат да ги снабдуваат трговците на мало со најмалку 70% од просечно продадените количини – појаснуваат од инспекторатот.

Државниот пазарен инспекторат, велат оттаму,  ќе постапува по сите утврдени неправилности и ќе изрекува соодветни мерки и санкции согласно со законските надлежности.

Пазарниот инспекторат апелира сите економски оператори во големопродажба и малопродажба да постапуваат во согласност со донесените одлуки, со цел обезбедување фер пазарни услови и заштита на интересите на земјоделците и граѓаните.