МОЖНО ЛИ Е ДА СЕ СЛУЧИ НАСТАН КАКО 9/11? Популарен аналитичар предупредува на напад за мобилизација за глобална војна
Предупредувам дека ќе има уште еден ваков настан – нешто што ќе ја шокира јавноста и ќе ги обедини луѓето, вели Селенте. Според него, такво сценарио може да се случи или во Европа или во САД.
Американскиот геополитички аналитичар Џералд Селенте предупредува дека, ако продолжи ескалацијата на глобалните конфликти, постои ризик од настан кој би можел драматично да ја шокира јавноста и да создаде масовна поддршка за нова голема војна. Во изјави што кружат на социјалните мрежи и во интервјуа, Селенте вели дека не може да се исклучи можноста за т.н. „false flag“ напад – инцидент што би бил претставен како дело на непријател со цел да се обедини јавноста зад воена агенда.
– Предупредувам дека ќе има уште еден ваков настан – нешто што ќе ја шокира јавноста и ќе ги обедини луѓето – вели Селенте. Според него, такво сценарио може да се случи или во Европа или во САД. Тој тврди дека веќе може да се забележи постепено подготвување на јавноста преку медиумски наративи и растечка реторика насочена кон исламскиот свет.
Во своите изјави Селенте потсетува и на настан од 2001 година, кога тогашниот американски министер за одбрана Доналд Рамсфелд ден пред нападите на 11 септември изјави дека Пентагон има сериозни проблеми со финансиското следење на околу 2,3 трилиони долари од буџетските трансакции.
Според Селенте, по нападите на 11 септември јавниот фокус целосно се пренасочил кон „војната против тероризмот“, а дебатата за финансиската контрола на Пентагон исчезнала од медиумите.
Сепак, повеќе независни проверки на факти укажуваат дека изјавата на Рамсфелд често е погрешно интерпретирана. Не станувало збор за „исчезнати“ пари, туку за административни и сметководствени проблеми во следењето на одредени трансакции во огромниот буџет на американското Министерство за одбрана.
Џералд Селенте е основач на Trends Research Institute и со децении настапува како коментатор на глобалните економски и геополитички трендови. Тој стана познат по предвидувањата за финансиската криза во 2008 година, но често привлекува внимание и со драматични предупредувања за можни воени конфликти, колапс на финансиски системи или големи политички пресврти.
Дел од неговите прогнози се покажале точни, но други останале на ниво на контроверзни или недокажани сценарија.