СТРАВ ВЛАДЕЕ ВО СЕЛАТА ВО СТАРО НАГОРИЧАНЕ Поради серискиот убиец некои жители ги напуштиле домовите
Повеќето жители го познаваат осомничениот, за кого кажуваат дека со велосипед се движел низ селат и го чувал добитокот.
Страв и неизвесност владее помеѓу населението во руралните места од општина Старо Нагоричане, откако полицијата уапси 25-годишен жител на село Малотино, осомничен за убиство на 78-годишна жителка на село Челопек.
Поради страв дел од семејствата си ги зеле повозрасните родители од неколкуте села од општината. Оние коишто останале се загрижени за својата безбедност. Повеќето го познаваат осомничениот, за кого кажуваат дека со велосипед се движел низ селат и го чувал добитокот.
– Стравуваме како не, сама си седам, ама сега ми е страв. Некои жени постари сите ги одведоа или ќерки, синови, или доаѓаат често. Се надеваме дека ќе биде побезбедно. Државата и институциите да направат нешто за да не се плашат жителите, инаку како ќе живееме. Секоја година сме сè постари и како ќе се одбраниш кога ќе ти дојде некој таков – изјави Добрица Јовановска, жителка на селото Челопек.
Како што наведуваат од кумановската полиција, на 12 февруари, осомничениот влегол во домот на 78 годишната жена, физички ја нападнал и со перница ја задушил жената.
„Во село Драгоманце, општина Старо Нагоричане, полициски службеници од полициското одделение Старо Нагоричане го лишиле од слобода Т.Б.(25) од село Малотино, општина Старо Нагоричане, поради сомнение дека сторил кривично дело по член 123 од Кривичниот законик. Тој се сомничат дека на 12 февруари во нејзиниот дом физички ја нападнал и ја задушил со перница М.С.(78) од село Челопек, општина Старо Нагоричане, по што таа починала на местото“, соопшти полицијата.
Жителите се вознемирени дека со него се поврзуваат и други случаи, слични како убиството во Драгоманце. Според информациите, се работи за 5 убиства на жени.
– Јас сум поранешен директор на училиштето, тој тука живее во близина на школото. Го чуваше добитокот. Ја познавам жртвата која потекнува од нашето село, тука како пензионерка си живееше. Навистина сме вознемирени, немавме вакви случаи, мора да се заклучуваме, да внимаваме – вели Владо Јакимовски, жител на селото.
За една од жртвите која е помлада жена беше дадена наредба за ексхумација и за обдукција. Изминатите неколку дена ОЈО Куманово и истражниот центар, МВР и екипите на Институтот за судска медицина обезбедиле докази кои укажуваат на поврзаност на овој настан со неколку други слични случаи во Старо Нагоричане.
„Заради сличности во однос на изборот на жртвата и суровиот начин на извршување на делото се испитува дали и во тие случаи станува збор за убиства извршени од истиот сторител. За една од потенцијалните жртви беше наредена ексхумација и обдукција, од телото на починатата жена се подигнати траги и ДНК кои се вештачат. Истражните органи работат на сложени вештачења и анализи, како и други дејствија за обезбедување докази, кои во моментов не можат да бидат споделени со јавноста поради тајноста на постапката“, соопшти Обвинителството пред неколку дена.
Обвинителството нареди и психијатриско вештачење на осомничениот од страна на тим вешти лица – форензички психијатри од Институтот за психијатрија во Скопје.