НЕТФЛИКС ЈА КУПУВА ИСТОРИЈАТА НА ХОЛИВУД Ворнер Брос проголтан за 72 милијарди долари
Аналитичарот Том Харингтон од „Ендерс Аналисис“ оцени дека „ако договорот биде одобрен, ќе ја пренареди целата индустрија“. Според него, можни се намалувања во филмската и телевизиската продукција, а за гледачите – поскапи претплати.
Нетфликс го финализира најголемиот потег во својата историја, купување на филмскиот и стриминг-бизнисот на Ворнер Брос Дискавери за 72 милијарди долари. Оваа трансакција, потврдена денес од двете компании, ја менува архитектурата на глобалната индустрија за забава.
Класиците на Ворнер Брос достапни преку Нетфликс
Тед Сарантос, коизвршен директор на Нетфликс, изјави дека комбинацијата на легендарната архива на Ворнер Брос, со класици како Казабланка, Хари Потер и Игра на тронови, и стриминг-портфолиото на Нетфликс ќе создаде „нов век на раскажување приказни“.
– Ворнер Брос ја дефинираше забавата во минатиот век, а заедно ќе го дефинираме следниот – рече Сарантос.
Дејвид Заслав, извршен директор на Ворнер Брос Дискавери, оцени дека ова е историска фузија.
– Со здружување со Нетфликс ќе осигураме највлијателните приказни на светот да останат достапни за генерации што доаѓаат – додаде тој.
Зделката, вредна 27,75 долари по акција, доби едногласна поддршка од управните одбори. Вкупната вредност, вклучувајќи ги долговите на Ворнер Брос, се проценува на над 82 милијарди долари.
Кога стримингот го голта Холивуд
Аналитичарот Паоло Пескаторе ја нарече зделката „огромна изјава на намери“.
– Нетфликс ја зацементира својата амбиција да стане глобален лидер во новиот поредок на стримингот – рече тој, предупредувајќи дека интеграцијата може да биде „главоболка“ поради обемот на компаниите.
Пазарните експерти предвидуваат регулаторни пречки. Американската комисија за конкуренција може да го разгледува влијанието на новата корпорација, бидејќи комбинацијата Нетфликс–Ворнер создава ентитет со доминација во содржина и во технологија.
Аналитичарот Том Харингтон од „Ендерс Аналисис“ оцени дека „ако договорот биде одобрен, ќе ја пренареди целата индустрија“. Според него, можни се намалувања во филмската и телевизиската продукција, а за гледачите – поскапи претплати.
Империја на екранот и на „клаудот“
Нетфликс ќе ја заврши аквизицијата по раздвојувањето на Ворнер Брос на два јавни сегменти: стриминг и студија, и глобални мрежи (Си-Ен-Ен, спортски и европски канали). Со тоа компанијата го проширува својот студиски капацитет и влегува во класичниот холивудски бизнис, чекор што може да ја трансформира во најголемата медиумска сила на 21 век.
Во овој нов сојуз, дигиталното и филмското се спојуваат во симфонија на екраните, од старите филмски ленти до алгоритмите на иднината.