СТИВ ЏОБС ЌЕ СЕ НАЈДЕ НА МОНЕТА ОД 1 ДОЛАР Калифорнија му оддава признание на технолошкиот гениј
Гувернерот на Калифорнија, Гавин Њусом, при номинацијата изјави дека Џобс „го отелотворува уникатниот дух на иновативноста, на кој се темели Калифорнија“.
Американскиот монетарен завод го објави дизајнот на спомен-монета од 1 долар посветена на покојниот коосновач и извршен директор на Епл, Стив Џобс.
На монетата е прикажан Џобс на млади години, седнат со прекрстени нозе пред пејзаж на северна Калифорнија – ридест предел со дрвја, и, се разбира, со својот препознатлив имиџ – црна ролка. На неа стои и натписот „Make something wonderful“, („Направи нешто чудесно“) цитат од 2007 година што неговото семејство го смета за суштина на неговиот светоглед и наследство.
Спомен-монетата ќе чини 13,25 долари, а ќе биде достапна во 2026 година.
Ова е дел од националната програма „American Innovation“, започната во 2018 година, со која секоја сојузна држава може да избере своја значајна личност или изум. Калифорнија го избра Џобс, а Висконсин, суперкомпјутерот Креј-1 од 1970 година.
Гувернерот на Калифорнија, Гавин Њусом, при номинацијата изјави дека Џобс „го отелотворува уникатниот дух на иновативноста, на кој се темели Калифорнија“.
Стив Џобс е роден во 1955 година во Сан Франциско и е посвоен од Пол и Клара Џобс. Рано покажал интерес за технологија и дизајн, а во средно училиште го запознал Стив Возниак, со кого во 1976 година ја основа Епл Компјутер.
Под негово водство, Епл создаде револуционерни производи, Мекинтош, Ајпод, Ајфон, Ајпад – што засекогаш го сменија начинот на кој луѓето комуницираат со помош на технологијата.
По кратко заминување од компанијата во 1980-тите, Џобс се врати во 1997 година и го предводеше растот на Епл во глобален технолошки гигант. Почина во 2011 година, оставајќи зад себе трајно влијание во светот на иновациите, дизајнот и претприемништвото.
View this post on Instagram