ТАИНСТВЕН ОБЈЕКТ СЕ ПРИБЛИЖУВА КОН ЗЕМЈАТА Дали станува збор за вонземјанска сонда?
Астрономите се изненадени бидејќи 3I/ATLAS, иако се приближува кон Сонцето, нема кометарна опашка. Харвардскиот астроном Ави Лоеб додава дека објектот се движи во истата орбитална рамнина како планетите и ќе мине покрај Јупитер, Марс и Венера, што отвора сомнеж дали неговата траекторија е случајна или намерно поставена.
Астрономите ја потврдија појавата на нов меѓуѕвезден посетител, објектот 3I/ATLAS кој е само трет досега потврден што доаѓа однадвор од нашиот Сончев систем. Според извештаите, првпат бил забележан од телескоп во Чиле, на почетокот на јули, објави ЦНБЦ ТВ 18.
Преовладувачкото мислење е дека станува збор за комета. Докази од вселенскиот телескоп „Хабл“ покажуваат знаци на кома, сјаен ореол од гас и прав што се создава кога мразот на кометата се загрева блиску до Сонцето. Но, ова објаснување не е без дилеми.
Необјасниви работи поврзани со објектот
Една од најголемите мистерии е недостигот на опашка. Иако се движи кон Сонцето, 3I/ATLAS нема видлива кометарна опашка, што ги збунува астрономите.
На мистеријата дополнително придонесува и неговата брзина. Со над 130.000 милји на час, се движи побрзо од објекти што обично се врзани од гравитацијата на Сонцето. Научниците велат дека ваквата брзина укажува на меѓуѕвездено потекло.
Истражувачите сметаат дека можеби бил исфрлен од својот матичен систем во близина на центарот на Млечниот Пат од поминување на блиска ѕвезда.
„Можеби станува збор за вонземјански артефакт“
Меѓу оние што даваат мислење е и харвардскиот астроном Ави Лоеб. Тој претходно привлече внимание со тврдењата дека друг меѓуѕвезден објект, „Oumuamua“, можеби бил вештачки. Тој сега сугерира дека и 3I/ATLAS би можел да биде вонземјански артефакт.
Во неодамнешна објава на Медиум, Лоеб напиша: „Откривањето на ‘вонземјански артефакт’ би ги ресетирало нашите приоритети кон истражување на просторот надвор од Земјата, наместо да се фокусираме само на земни конфликти. На човештвото очајно му е потребно будење“.
Лоеб не ја отфрла теоријата за комета, но тврди дека шансите за нешто необично се поголеми отколку што се претпоставува. На своја скала од 1 до 10, тој моментално го оценува 3I/ATLAS со „4“ – аномалија што потенцијално може да биде техно-потпис.
„Ова е доволно необично за да обрнеме внимание“
Тој направи споредба со секојдневна претпазливост: „Ако постои 40% шанса за несреќа при преминување улица, тоа е доволна причина да ги држиме очите отворени и да внимаваме на приближувачки автомобил,“ напиша Лоеб.
Лоеб укажува и на неговата необична траекторија. Објектот се движи во истата орбитална рамнина како и повеќето планети.
– Шансата тоа да се случи е една спрема 500. Уште поинтересно е што ќе помине блиску до Јупитер, Марс и Венера. Ова го поставува прашањето дали траекторијата е намерно дизајнирана – изјави тој за медиумите.
Засега, повеќето астрономи се уверени дека 3I/ATLAS е едноставно комета – чудна, но природна. Лоеб признава дека шансите да е вештачки објект „не му одат во прилог“. Сепак, тој тврди дека вреди да се држи под надзор.