📽 ЕКСПЛОЗИЈА ВО РУСКА ФАБРИКА, 20 МРТВИ И НАД 130 ПОВРЕДЕНИ Распрснати скршени стакла се забивале во телата на работниците

Бројот на загинати од експлозијата во фабрика во регионот Рјазањ минатата недела се искачил на 20, додека повеќе од 130 лица се повредени, соопшти Владата на Русија, објави Анадолија.

„До 7 часот наутро (04:00 часот според ГМТ) на 18 август, 20 лица загинаа како резултат на вонредната состојба во Шиловскиот реон. Има 134 повредени, од кои 31 пациент се наоѓа во болници во Рјазањ и Москва,“ се вели во соопштението на регионалниот оперативен штаб објавено на Телеграм.

Во соопштението се наведува дека останатите 103 повредени се на амбулантски третман, а потрагата и спасувачките операции на местото на експлозијата продолжуваат.

Гувернерот на Рјазањ, Павел Малков, во петокот изјави дека наутро избила експлозија и последователен пожар во работилницата, за која руската државна новинска агенција РИА, повикувајќи се на гувернерот, објави дека е магацин за барут во фабриката „Еластик“.

Првично Малков соопшти дека загинале 5 лица, а повеќе од 100 биле повредени, меѓу нив и од скршени стакла. Ден подоцна, тој го прогласи понеделник за ден на жалост во регионот.

Руското Министерство за вонредни ситуации потврди дека експлозијата се случила во петокот во селото Лесној, околу 250 километри југоисточно од Москва.

Според РИА, повикувајќи се на регионалното одделение на Истражниот комитет на Русија, е отворена кривична постапка поради сомнежи за прекршување на „барањата за индустриска безбедност“.