📷 ПРОДАДЕН НАЈГОЛЕМИОТ КАМЕН ОД МАРС НА ЗЕМЈАТА Вонземскиот метеорит плени со необичните особини

Метеорит, за којшто се верува дека е најголемото „парче“ од Марс паднато на Земјата, е продаден на аукција за 4,3 милиони долари (3,71 милиони евра), вклучувајќи ги даноците и другите трошоци.

Метеоритот, познат како „НВА 16788“ (NWA 16788), беше продаден во аукциската куќа „Сотби’с“ вчера.

Тежи 24,5 килограми, што го прави масивен во споредба со повеќето марсовски метеорити, коишто обично се само мали откршоци.

Метеоритот е откриен во ноември 2023 година во областа Агадез во Нигер. Тој е околу 70 отсто поголем од вториот најголем камен со потекло од Марс, а пронајден на Земјата. Исто така, е и многу редок. Само околу 400 марсовски метеорити се пронајдени на нашата планета, а овој е и најскапиот што некогаш е понуден на наддавање. Се издвојува по својата огромна големина и црвена боја, oбјави „Зи-ен-би-си“ (ZNBC).

Largest Mars rock ever found on Earth sells for $4.3m at auction https://t.co/J9N8M3L0vL

— BBC News (World) (@BBCWorld) July 16, 2025

Анализата на метеоритот откри дека каменот од Марс бил исфрлен во Вселената по удар на астероид што ги претворило неговите делови во стакло. Површината на метеоритот покажува стаклена кора што се формирала додека се движел кон Земјата.

Има и загрижени околу продажбата на метеоритот. Некои велат дека би требало каменот да биде подарен на науката.

– Би било штета ако овој пронајдок заврши во трезорот на некој олигарх, бидејќи припаѓа во музеј, каде што може да се изучува, каде што децата и семејствата можат да уживаат во него – нагласи професорот Стив Брусате од шкотскиот Универзитет на Единбург.

Метеоритите се остатоци од комета, астероид или метеороид што „го преживеале“ својот премин и согорувањето низ атмосферата на Земјата. Во 2023 година, карпа тешка 41 килограм падна од небото и во Касемпа, Замбија.