Дипломатската офанзива на Мицкоски даде резултат – ЕУ се согласи уставните измени да се разработат

Урсула фон дер Лајен во Скопје соопшти значајна нијанса во ставот на Европската Унија во врска со промените на македонскиот Устав, кои се услов Скопје да го отвори првото поглавје на преговорите со Брисел.

Претседателката на Европската комисија на прес-конференци рече: „Уставните измени треба да се разработат, тоа е важно!“

До сега, изјавите и пораките од Брисел беа поинакви – уставните измени мора да се усвојат. При тоа, се разбира, се имаа предвид уставните промени стокмени од претходната влада на ДУИ и на СДСМ, кои никогаш формално не влегоа во парламентот.

Слушајте и читајте внимателно, драги мои!

Едно е да се нареди уставните промени да се усвојат, а друго е да се каже дека уставните промени треба да се разработат.

Разликата е суштинска и значајна!

Инаку, за да нема дилема, да го кажам и тоа дека преведениот глагол „разработат“ прилично прецизно одговара на „to be worked on“, како што се изрази Фон дер Лајен на англиски јазик.

Тоа значи дека на уставните промени допрва ќе се работи и дека финалниот предлог мора да биде прифатлив и за Македонија, а не само за Бугарија и за ЕУ.

Нема дилеми дека оваа крупна промена е резултат на дипломатската офанзива на Христијан Мицкоски и на неговиот обид да ги објасни резервите на неговата влада кон предлогот што го дизајнираше претходната влада под бугарски диктат.

Искреноста и упорноста со која Мицкоски ја презентираше промената на македонската позиција во однос на ова прашање вродија со плод – неговиот предлог за уставни промени со одложено дејство, не само што доби речиси консензуална поддршка на домашната политичка сцена, туку еве, суштински ја менува и позицијата на европската „влада“ во врска со ова прашање.

Сервилните, циниците и скептиците добија заслужена лекција.

Како и во секоја друга област, како и во животот воопшто, сака помалку веднење глава и лигавење, а повеќе работа, креативност и упорност.