НЕ Е СЀ ТАКА КАКО ШТО ИЗГЛЕДА Пронашле човечка рака на плажа или нешто друго?

„Човечка рака“, откриена на плажа во близина на Свонси, Јужен Велс, предизвика итна реакција на полицијата – но не е сѐ така како што изгледа.

Додека патролирале, полицајците биле повикани од членовите на крајбрежната стража на плажата, пишува Скај њуз.

Полицајците добиле пријава дека на плажата е пронајдена „човечка нога или рака“.

Силите соопштија дека областа за која станува збор е позната по тоа што има исфрлени делови од мртви фоки или од други морски животни.

За членовите на јавноста може да биде тешко да ја разликуваат коската на човекот и на фоката бидејќи и фоките имаат 5 прсти.

Експертот за таа проблематика, Герет Ричардс, кој ја води групата „Гавер сил груп“ (Gower Seal Group), случајно тогаш поминувал таму и полицајците му побарале помош.

На полицајците и на Ричардс им биле потребни 4 часа да ги пронајдат останките, пред да бидат идентификувани како дел од фока.

Тој изјави дека некој направил фотографии од она што тие веруваат дека е „човечка рака“ која излегува од песокот.

– Еден член на јавноста фотографираше и ја испрати фотографијата до службите за итни случаи. Но, многу е тешко да се протолкува фотографијата и изгледаше малку сомнително. Се разбира, тоа никогаш не е подобро одошто да отидам на местото на настанот и да фрлам брз поглед – изјави Ричардс.

Според Ричардс, фоката била стара околу една година, а птиците ја пронашле. Тој рече дека е само случај на среќа што тој бил „на вистинското место во вистинско време“.

– Поради видот на повикот што всушност дошол, дежурниот истражител бил информиран, а истражителите на местото на злосторството биле на готовност. Значи, тоа веројатно ѝ заштедило на полицијата, а секако и на даночниот обврзник, неколку илјади фунти, само бидејќи бев во близина – додаде тој.