Кучињата касаат, чиповите не вршат работа

Во полицискиот билтен на Министерството за внатрешни работи (МВР) секојдневно се појавуваат пријави од граѓани ширум земјава кои биле нападнати од кучиња-скитници, но најголемиот дел од нападите се случуваат на територијата на Град Скопје.

Направивме кратка анализа на сите полициски билтени издадени во изминатите 30 дена, па забележавме дека дневно, во просек, има најмалку две пријави од скопјани кои на сопствена кожа ги почувствувале забите на кучињата-скитници. Според тоа што е наведено во билтените, најголем дел од нападите се случуваат на неколку исти места во главниот град – Жена Парк, Градски парк, Плоштад „Македонија“, паркот во Ѓорче Петров, населба Даме Груев, Драчево и Аеродром.

Истата приказна

Од Град Скопје, како и обично, ја повторуваат истата приказна: „Работиме на систематско решавање на проблемот со бездомните кучиња, во рамки на нашите ингеренции“.

Оттаму се фалат дека во последните три години инвестирале многу во областа за подобрување на состојбата со бездомните животни преку градење нов модерен стационар по светски стандарди.

Ги запрашавме каков е реалниот ефект од задолжителните поткожни чипови што скопјани мораа да им ги инсталираат на своите домашни миленици, а од Град Скопје одбегнаа да ни дадат конкретен одговор.

– Околу самиот процес на чипирање, чија цел е воведување на принципите на одговорно сопствеништво е намалување на бројот на улични кучиња кои се создаваат од неодговорни сопственици, а со целосно чипирање на домашните миленици би се намалил овој број. Самиот процес на чипирање на кучињата во државата е проект кој се реализира од страна на Агенцијата за ветерина и за поконкретни бројки обратете се кај нив – велат од Град Скопје за Плусинфо.

Чиповите не вршат работа

Од друга страна, пак, според Здружението за заштита на животните „Анима мунди“, чиповите имаат некаков ефект, но како што велат, тој ефект е занемарлив во споредба со проблемот кој постои. Оттаму посочуваат дека чиповите немаат соодветна функционалност.

– За решавање на проблемот со напади од бездомни кучиња, првиот сегмент за подобрување на ситуацијата е наместо да се исплаќаат оштети на граѓаните, со тие средства треба масовно и брзо да се изврши стерилизација на бездомните кучиња, а тоа може да се изведе на повеќе методи. Јавното претпријатие „Лајка“ го нема капацитетот кој може да ги задоволи потребите на целиот град. Неопходно е да се овозможи бесплатен ваучер-систем за стерилизација во соработка со ветеринарните станици во Скопје – објаснуваат од „Анима мунди“.

Вториот и клучен сегмент, додаваат оттаму, е воспоставување на поголема контрола врз одговорното сопствеништво на миленици, бидејќи, како што посочуваат, 90 отсто од нападите се од домашни миленици кои се пуштени да се прошетаат, па подоцна ги прибираат дома.

– Бездомните животни за да преживеат на улица, мораат да се социјализираат. Тие се локалци, си фаќаат една територија, ја чуваат и за да преживеат мора да бидат мирољубиви. Статистиките покажуваат дека 90 отсто од каснувањата се од кучиња кои имаат некаков сопственик – тврдат од „Анима мунди“.

Срамот е наш

Освен нашите сограѓани, незаштитени од уличните кучиња се и гостите кои доаѓаат во нашата земја. На пример, соработничката за истражување на Универзитетот од Оксфорд, Тена Прелец, вечно ќе ја памети посетата на градот Охрид, бидејќи беше касната од бездомно куче.

Прелец на својот Твитер профил, објави фотографија од нејзината повредена рака и напиша:

„Прв пат во Брза помош, ме касна куче-скитник. Благодарам на охридските лекари и до Линда од МНР“

Таа беше дел од „Преспа форум за дијалог“, на кој учествуваа гости од Европа и од светот.