ВМРО-ДПМНЕ: Откако зовреа социјалните мрежи, дојде казната од 50 евра за возење без кацига

Денес власта на Заев се обидува бесрамно да глуми правна држава. Изречената казна од 50 евра за Зоран Заев, Венко Филипче и Љупчо Николовски е обичен пи-ар театар во услови кога власта на Заев е фатена до гуша во скандал со коруптивниот случај со контроверзниот бизнисмен Дака Давидовиќ, реагира ВМРО-ДПМНЕ.

„Сега ќе глумат владеење на правото за казна од 50 евра за сообраќаен прекршок, а криминален бизнис тежок 200 милиони евра поминува без никаква реакција на институциите. Аболицираниот за криминал од 8 милиони евра, човекот кој сите го слушнаа и видоа како бара евро за вицето, човекот кој е капо ди тути капи на сите криминални, корупциски и рекетарски мрежи во Македонија не може да биде пример за право и правда. Ова е само блед обид како да се затвори еден сообраќаен прекршок, дури откако јавноста дозна за него преку социјалните мрежи. Апсурдот да биде поголем овој сообраќаен прекршок бил направен на очиглед на припадници на МВР кои се дел од неговото обезбедување и никој не го спречил или санкционирал, сѐ до оној момент кога не се дозна во јавноста. Тоа е методот на криминалците и прекршителите на законот, ако помине-помине, ако не ќе релативизираат, ќе се извинуваат до небо и ќе прават евтин пи-ар“, се наведува во реакцијата од ВМРО-ДПМНЕ.

Премиерот Зоран Заев, вицепремиерот Љупчо Николовски и министерот Венко Филипче се казнети за сторен сообраќаен прекршок, неносење заштитна кацига. Од платните налози што ги објавија некои медиуми, се гледа дека тројцата функционери платиле по 50 евра казна. Заев, Николовски и Филипче биле сопрени на булеварот Гоце Делчев во близина на владата пред три дена, а од возењето се појави и аматерска снимка на социјалните мрежи.