Започна со работа центарот „Една точка за услуги“ во Тетово
На порталот во моментот се достапни 136 електронски услуги, а овој број постојано ќе се зголемува.
Вкупно 136 услуги објавени на порталот uslugi.gov.mk. од денеска се достапни и на тетовци во рамки на проектот „Една точка за услуги“. Центрот во кој граѓаните ќе можат од едно место да ги побараат сите услуги е сместен во интернет клубот во Тетово.
– Овој простор е место каде што граѓаните ќе можат да добијат информации за сите електронски услуги, достапни на порталот uslugi.gov.mk. Граѓаните кои ќе имаат проблем сами од својот дом да се регистрираат на порталот тука ќе можат да го направат тоа. Дополнително, со помош на Каталогот на услуги, вработените тука ќе можат да ги дадат информациите потребни за добивање на секоја од 761 услуга објавена на порталот – рече министерот за информатичко општество и администрација Дамјан Манчевски.
На порталот во моментот се достапни 136 електронски услуги, а овој број постојано ќе се зголемува. Во завршна фаза се активностите за дигитализација на уписот на дете во градинка, упис во училиште, како и дигитализација на дел од услугите кои ги нуди МВР.
Концептот на Една точка за услуги веќе успешно функционира во Скопје, а започнат е и процесот во Охрид и Куманово. Идејата е во сите градови по примерот на Тетово, постоечките интернет клубови да се претворат во место кое ќе служи како сервисна и регистрациона точка на граѓаните.