Казнети 23 жители на Кочани со по 2.000 евра

Основното јавно обвинителство Кочани поднесе предлози за казнени налози против 23 лица кои во одделни кривично правни настани го сториле кривичното дело – непостапување според здравствени прописи за време на епидемија од член 206 став 1 од Кривичниот законик.

– Сите обвинети не ги почитувале мерките на Владата на Република Северна Македонија за сузбивање на опасната болест предизвикана од коронавирусот, со тоа што пеш или со возило се движеле низ градот за време додека во сила била забраната за движење на населението на територијата на државата – соопштија од ОЈО.

За стореното кривично дело, Обвинителството му предложило на судот на обвинетите да им изрече парични казни во висина до 2.000 евра.

За две лица, Обвинителството до надлежниот суд поднесе Обвинителен предлог, бидејќи тие покрај стореното кривично дело –  Непостапување според здравствени прописи за време на епидемија од член 206 став 1, го сториле и кривичното дело – напад врз службено лице при вршење работи од безбедноста од член 383 став 2 во врска со став 1 од Кривичниот законик, наведоа од ОЈО