ВМРО-ДПМНЕ: Арената „Борис Трајковски“ да се подготви за згрижување пациенти со коронавирус

Предлагаме подготовка на големите спортски објекти, на пример арената „Борис Трајковски“ да се подготви за примање и згрижување на поголема група пациенти заразени од коронавирусот, а тоа да биде направено по примерот на соседните главни градови Софија, Белград и Загреб, рече на денешната прес-конференција Игор Николов, член на ИК на ВМРО-ДПМНЕ.

Тој истакна дека и покрај препораките на Светската здравствена организација (СЗО) да се тестираат што поголем број на граѓани под мотото „Тестирај, тестирај, тестирај“, особено за ризичните групи, загрижува податокот дека само лимитиран број на тестови се изведуваат во текот на 24 часа при што во континуитет, како што додава, се добива дневно слична бројка на ново заболени.

– Во исто време загрижува и фактот што медицинскиот персонал е во најголем процент од заразените пациенти односно околу 12%, а со начинот на менаџирање на кризата и недостигот на медицинска опрема, најверојатно овој процент ќе се зголемува и понатаму. Комисијата за здравство на ВМРО-ДПМНЕ во врска со пандемијата на коронавирусот и пропагацијата на Ковид-19 ги дава следните предлози: Ургентно да се преземат мерки за обезбедување на соодветна опрема за персоналот и негова заштита, штедење на истиот, преку точно подготвен и испланиран Бел план за функционирање на здравствените институции. Голем број од здравствените институции во моментот не спроведуваат никаков план за ротации на персоналот, ниту пак и редукција на активноста. Потребен е јасен алгоритам каде ќе се следат и третираат бремените жени кои се пред породување, а ќе бидат со инфекција Ковид-19. Потребен е алгоритам каде ќе се следат и третираат оноколошките пациенти кои ќе бидат со инфекција Ковид-19. Имаат ли институциите за онколошки пациенти протокол за подготовка и следење на истите? Да се организира превоз за вработените во здравствените организации кои заради полицискиот час и вонредната состојба имаат проблеми да дојдат и да си одат од работните места. За чудо здравствените работници во кампусот „Мајка Тереза“ се уште плаќаат паркинг. Неопходна е соодветна опрема за медицинските работници и обука на персонал кој ќе биде директно задолжен за лекување на пациентите кои ќе бидат позитивни на вирусот на корона – рече Николов.

Тој порача и да се дефинира и детерминира начинот на однесување со починатите лица, како ќе се транспортираат, по кои протоколи ќе се дезинфицираат возилата и просториите каде што се одложуваат.

– Предлагаме рестриктивни мерки и прогласување на карантин во градовите со најмногу инфицирани и заболени пациенти. Тоа се Скопје, Куманово и Струга. Регионите од каде има и најмногу починати се практично најзагрозени за понатамошно ширење на болеста. Информациите кажуваат дека во местата во околината на Струга има поголем број на заболени кои не се под медицинска контрола. Потребно е итно преземање на мерки за корегирање на ваквата состојба. Предлагаме подготовка на големите спортски објекти, на пример арената „Борис Трајковски“ да се подготви за примање и згрижување на поголема група на пациенти. Тоа да биде направено по примерот на соседните главни градови Софија, Белград и Загреб. И на крај да се продолжи со барање на меѓународна помош која би била во опрема, материјали и експерти – порача Николов.