5 ПРЕДВИДУВАЊА ЗА ВОЈНАТА ОВАА ЗИМА Изморени војски, бегалци, пролетна офанзива, обид за пресврт во Херсон…

Ден Сабаг, уредникот за одбрана и безбедност на Гардијан, направи листа од пет предвидувања за следните шест месеци од војната во Украина. Според него, војната ќе трае најмалку година дена, но и Русите и Украинците се изморени. Русите се надеваат дека Западот ќе престане да праќа оружје и немаат конкретен план, додека Украинците имаат план за пресврт во Херсон за кој немаат оружје, а Западот не се решил што ќе прави.

Меѓу другото тој предвидува милион бегалци во Полска и можен референдум во руските територии. Дури напролет би било времето за нови поголеми офанзиви и поместувања.

Војната ќе трае една година

 Сабаг пишува дека војната најверојатно ќе трае најмалку една година, но во суштина е во ќор-сокак и нејзиниот интензитет се намалува.

Можеби поминаа шест месеци војна, но ниту Украина ниту Русија не се подготвени да престанат со борбите и покрај претрпените загуби. Украина сака да ги врати окупираните територии, а Русија сака да продолжи да нанесува болка, не само на својот противник, туку и на Западот. Кремљ верува дека зимата ќе биде значаен момент во нивна полза.

Немаше разговори меѓу двете страни откако се појавија докази за масакрите во Буча, Ирпин и други територии окупирани од Русија северно од Киев. Но, движењето на првите линии е нормално по падот на Лисичанск на крајот на јуни. Двете страни се борат за импулс, но сѐ повеќе изгледаат истрошени во битките.

Украинците немаат средства за пресврт во Херсон

На Украина ѝ недостасуваат средства за ефикасен конвенционален контранапад, додека герилските напади се оптимистички начин да се забрза колапсот на Русија. Ако има пресврт Украинците се надеваат тоа да биде во Херсон, за што Плусинфо веќе пишуваше.

Украинците би сакале повторно да го заземат овој град на западната страна на реката Днепар, но висок функционер на администрацијата приватно призна дека „немаат доволно капацитет да ги турнат Русите назад“. Киев ја префрли својата стратегија кон интензивирање на ракетните напади со долг дострел и смели напади на специјалните сили врз руските бази длабоко зад линиите на фронтот.

Советникот на украинскиот претседател, Михаило Подољак, рече дека целта е „да се создаде хаос во руските сили“, но иако тоа ќе ја намали ефикасноста на напаѓачите, веројатно нема да доведе до тоа Русите доброволно да го предадат Херсон, како што Украинците се надеваа…

Русија нема план, освен да продолжи како досега

Русија сè уште сака да го придвижи својот пат напред, но нејзиниот фокус најверојатно ќе се префрли на задржување на освоените територии и анексија на украинска територија.

Русија нема никаков нов офанзивен план освен масовна артилерија, уништување градови… Делумно тоа го прави затоа што е ефикасна, но и за намалување на жртвите бидејќи според западните проценки изгубила околу 15.000 луѓе. Руската војска ја продолжува оваа стратегија околу Бахмут во Донбас, но напредокот е бавен, делумно поради тоа што Русија мораше да прераспореди некои сили за да ги зајакне своите трупи околу Херсон.

Кремљ можеби не го постигна она на што се надеваше на почетокот на војната, но Русија сега држи големи делови од украинската територија на исток и југ и планира да одржи референдум за анексија. Како што се приближува студеното време, тие најверојатно ќе се фокусираат на консолидирање на она што го имаат.

Зимава милион бегалци ќе дојдат во Полска

Зимата, најважната ставка во стратешкото размислување за двете страни, ќе предизвика нов бегалски налет. Украина веќе е загрижена за хуманитарни прашања бидејќи нема греење на гас за станбените блокови во регионот Доњецк и другите области на фронтот. Еден хуманитарен службеник предвиде дека ќе има нов бран на миграција во текот на зимата, при што можеби дури милион луѓе ќе ја преминат границата кон Полска.

Русите ја гледаат зимата како можност. Украина стравува дека Русија ќе ја таргетира нејзината енергетска мрежа, што ќе ги влоши нејзините проблеми со греењето и дека би можела да ја затвори најголемата европска нуклеарна централа во Запорожје. Москва, исто така, сака да ги продолжи борбите на Западот околу трошоците за енергија.

Пролетта може да биде време за нов напад. Секоја страна ќе сака да се наполни и да се подготви за она што веројатно ќе биде уште една сезона на борби.

Западот да си одлучи што сака

Западот треба да одлучи дали сака Украина да победи или само да издржи и треба да ја балансира хуманитарната помош со потребите на Украинците.

Украина ќе беше поразена без западната воена помош. Но, во ниту еден момент до сега Западот не испорача доволно артилерија или друго оружје како што се борбени авиони за да му овозможи на Киев да ги врати окупаторите назад.

Политичарите зборуваат за потребата од принудување на Русија на предвоени граници, но не даваат доволно материјал за тоа. Во исто време растат и хуманитарните потреби на Украина. На пример, немаат доволно пари за реконструкција. Многу куќи и згради североисточно и северозападно од Киев се сè уште во урнатини, пет месеци по заминувањето на Русите, а локалните жители често живеат во гаражи или привремени објекти.

Луѓето кои се внатрешно раселени често мора да живеат во училишта и градинки. Украина има буџетска дупка од пет милијарди долари месечно поради војната, а помошта и реконструкцијата ќе чинат многупати повеќе.