38.000 лица над 70 години се пријавиле за вакцина против ковид-19
Од следната недела вакцинацијата ќе почне и кај здравствените работници во болниците низ државата, како и во приватните болници за персонал кој работи со пациенти позитивни на коронавирусот.
Триесет и осум илјади лица над 70 години до денеска се пријавени за вакцинација против ковид-19, соопшти Министерството за здравство.
Досега преку веб-страницата „Vakcinacija.mk“, 55.970 лица ја пополниле формата за аплицирање преку искажување на интерес за вакцинација против ковид-19, а преку матичниот лекар за вакцинација се пријавиле 29.209 лица.
Вчера беа вакцинирани првите 202 здравствени работници со вакцините „Фајзер“, кои се донација од Србија. Од следната недела вакцинацијата ќе почне и кај здравствените работници во болниците низ државата, како и во приватните болници за персонал кој работи со пациенти позитивни на коронавирусот.
Во неделата, од Србија стасаа 4.680 вакцини од компанијата „Фајзер“, а во текот на следната недела се очекува да пристигнат и другите количини од Србија.
До крајот на месецов се очекува да пристигнат и 200-те илјади вакцини од Кина.