150 МИЛИЈАРДИ ФУНТИ ИНВЕСТИЦИИ НАЈАВИ ТРАМП Економски бум за Британија, компании од САД со рекордни вложувања
САД вложуваат рекордни 150 милијарди фунти во Британија, илјадници нови работни места и поддршка од големите компании.
Обединетото Кралство ќе биде домаќин на огромен прилив на американски капитал, вреден 150 милијарди фунти, како дел од договорите постигнати за време на официјалната државна посета на американскиот претседател Доналд Трамп.
Британската влада соопшти дека благодарение на овие вложувања ќе бидат создадени околу 7.600 „висококвалитетни работни места“, што претставува силен поттик за економијата на земјата.
Премиерот Кир Стармер го поздрави овој чекор, потенцирајќи дека станува збор за „историска можност“ која доаѓа во вистински момент.
Најголем дел од вложувањата ќе дојдат од американскиот гигант Блекстоун, кој најави 90 милијарди фунти нови инвестиции, надополнети со претходно објавени 10 милијарди фунти за развој на дата-центри. Инвестициската компанија Прологис ќе вложи 3,9 милијарди фунти, а Палантир, позната по развој на софтвер за анализа на податоци, ќе инвестира дополнителни 1,5 милијарди фунти.
Во дипломатски дел од посетата, американскиот претседател беше пречекан и од британскиот крал Чарлс III во замокот Виндзор. Монархот јавно ја истакна „личната посветеност“ на Трамп за обидите да се стави крај на вооружените конфликти ширум светот, нарекувајќи ја таа определба „вредна за почит“.
Високите инвестиции и политичката тежина на посетата се толкуваат како знак за продлабочување на англо-американските односи, во период кога Велика Британија се обидува да ја зајакне својата економија и меѓународна улога по Брегзит.