ЗНМ СО ОСТРА РЕАКЦИЈА КОН СДСМ Јавните напади врз медиумите се опасни за демократијата

Здружението на новинари на Македонија (ЗНМ) остро реагираше на денешната прес-конференција на портпаролката на СДСМ, Богданка Кузеска, оценувајќи дека јавното етикетирање и дискредитирање на медиумите од страна на политички субјекти е загрижувачко и штетно за слободата на изразување.

Од ЗНМ предупредуваат дека ваквите настапи можат да создадат притисок врз медиумите и да ја нарушат довербата на јавноста, што, како што наведуваат, е недозволиво во едно демократско општество.

– Политичките субјекти треба да се воздржат од јавни напади и дискредитација на медиумите. Таквите постапки можат да имаат ограничувачко влијание врз слободата на изразување и да ја поткопаат довербата во јавниот простор – реагираат од ЗНМ.

Во реакцијата се посочува дека доколку постои сомнеж за неетичко или непрофесионално известување, политичките партии имаат на располагање јасно утврдени саморегулаторни механизми, наместо јавни прозивки.

– Во конкретниот случај, СДСМ, наместо јавно да ги рецензира медиумите, требаше да ги искористи механизмите на саморегулација. Советот за етика во медиумите и Советот на честа постојат токму за институционално и аргументирано да се проверат вакви наводи – наведуваат од ЗНМ.

Од Здружението апелираат на одговорност и почитување на медиумските слободи, нагласувајќи дека притисоците и јавните дисквалификации не придонесуваат за подобрување на јавниот дискурс, туку напротив – го нарушуваат.