ЗНМ: МВР ги казни полицајците што ја попречуваа работата на новинарката Секуловска

Здружението на новинарите на Македонија (ЗНМ) ја поздравува одлуката на Внатрешната контрола на МВР која утврди незаконско постапување на полициските службеници за попречување на новинарката Билјана Секуловска при вршење на своите професионални обврски.

„Имено, на 07.06.2020 година околу 19.00 часот, новинарката Билјана Секуловска, при обавување на професионалните задачи сликала полициска патрола која вршела контроли за време на полицискиот час. И покрај тоа што Секуловска се претставила на полицијата и покажала дозвола за непречено движење за време на полициски час, полициските службеници и забраниле да ги снима и на груб начин се заканувале дека ќе ја тужат, бидејќи според нив не било дозволено да се снимаат полициски службеници. По овој настан Здружението на новинарите на Македонија испрати претставка до Внатрешната контрола при МВР поради попречување на правото на новинарката да известува од јавен простор за теми од јавен интерес. Дополнително, беше побарано итно да се спроведе постапка за утврдување на одговорност на полицискиот службеник, а потоа да биде спроведена и дисциплинска постапка во која ќе се утврди дали тој постапувал во согласност со Законот за полиција и Кодексот на полициска етика“, наведено е во соопштението.

Денеска бевме известени, додаваат од ЗНМ, дека Внатрешната контрола утврдила незаконско постапување на полициските службеници и дека тие ќе бидат соодветно казнети.

– Ваквата принципиелна практика може да помогне во градење на професионалниот однос меѓу нашите колеги и полицијата – рече претседателот на ЗНМ, Младен Чадиковски и додаде дека негативните случки треба да послужат како пример од кој ќе се извлече поука во насока на подобро разбирање на законските овластувања на полицијата при постапување на терен против новинарите.