Знамето на Фејсбук, Северна во срцето

Нека му е честито на македонското знаме – доби нови амбасадори!

И тоа не било кои, туку функционерите на СДСМ.

По синоќешниот инцидент во центарот на Скопје, кога беше искинато македонското знаме, денеска одеднаш се разбуди нов вид патриотизам во партијата на Венко Филипче.

Знамето, кое до вчера им беше „северно“, сега одеднаш се претвори во најважниот национален симбол, а неговите новопечени бранители се оние исти функционери што одлучија да го сменат името на државата без да ја почитуваат волјата на народот.

Ако патриотизмот беше спорт, екипата на Филипче ќе беше повеќекратен победник во дисциплината „глумење на социјални мрежи без пречки“.

Една фотографија, еден клик, и – оп! – се преродија во заштитници на сè што е македонско. Што да кажеме?

Не знам што е потрагично: дали тоа што ова го прават како реакција на јавен срам, или тоа што мислат дека народот ќе поверува дека со менување на профилна слика ги решиле сите проблеми со националната гордост.

Замислете го ова: Венко Филипче, лидерот на партијата која го спакува референдумот како детска играчка, сега гордо позира со македонското знаме на профилот.

Па, Венко, сега ли ти стана важно знамето? Каде беше досега тој порив за патриотизам?

Каја Шукова и Кристина Костова, новите потпретседателки, со фотографиите од знамето како да се подготвуваат за „курс за патриотизам за почетници“.

А нивните колеги – Оливер Спасовски, Благој Бочварски и Јована Тренчевска – изгледа задоцниле со предавањата за тоа како да се прави политички „damage control“ без да изгледаш патетично.

Мојот фаворит? Методија Илиевски. Нов потпретседател со големи амбиции, кој решил да го замени „патриотскиот пакет“ со кликање „upload photo“.

И за крај, тука е Јован Митрески, кој веројатно се прашува што погрешил, бидејќи неговиот патриотизам, очигледно, никој не го сфаќа сериозно.

Функционерите на СДСМ со оваа нивна „храбра“ акција успеаја да нè потсетат дека патриотизмот не е нешто што можеш да го облечеш како костим за Ноќта на вештерките.

Едноставно, не можеш да глумиш љубов кон државата, кога во секоја втора реченица ја додаваш „северна“ – и кога треба, и кога не треба.

Сепак, ова е Македонија, земја каде што политичарите мислат дека можат да го сменат мислењето на јавноста со едно „кликни тука“.

Народот можеби ќе ги лајкне нивните нови профилни, ама дали ќе им ја купи приказната? Тешко.

Драги функционери, патриотизмот не е филтер на Фејсбук. Ако веќе го глумите, барем вложете повеќе труд. И, најважно, не потценувајте ја интелигенцијата на народот.

Македонското знаме заслужува повеќе од вакви евтини маркетиншки трикови.