ЖЕСТОКИ НАВРЕДИ НА ЏАМБАСКИ ЗА КОВАЧЕВСКИ „Ти им беше машка секретарка на Заев и на Борисов“ (ВИДЕО)
Во видео обраќање на Фејсбук, бугарскиот европратеник се нафрли врз македонскиот премиер со лични навреди, обвинувајќи го дека е србоман.
Бугарскиот европратеник Ангел Џамбаски жестоко реагира на изјавата на премиерот Димитар Ковачевски дека не го познавал кој е тој и дека македонизмот секогаш ќе го има.
Во видео обраќање, Џамбаски му порача на Ковачевски дека неговите сопартијци од бугарското ВМРО знаеле кој е тој и од какво семејство потекнува.
– Ако добро се сеќавам, Ковачевски ги носеше кафињата додека траеја средбите на бившите премиери Бојко Борисов и Зоран Заев. Носеше папки, работеше некои бирократски работи, нешто како машка секретарка. Тоа е задачата на сите исполнувачи на туѓа волја. Тој е само фасада, тој ја исполнува волјата на Белград и на Кремљ – кажа Џамбаски.
Димитар Ковачевски тврди дека македонизмот бил изворен, но тој е антибугарска, нацистичка, фашистичка и болшевичка иделогија која има задача да ја искорени бугарската традиција, култура и историја во Македонија. Тоа е фалш идентитет кој е антибугарски, тврди Џамбаски.
Европратеникот се осврна и на личното име на премиерот Ковачевски кое било „бугарска Али Експрес верзија“.
Џамбаски му порача на македонскиот премиер дека македонската влада не решава ништо во врска со ЕУ.
– Ние Бугарите сме дел од Европската унија, а вие србоманите не сте. Ние Бугарите сме од оние што решаваат каде сте вие. Кои сте вие, решаваме ние, не вие Димитар или Белград. Вие не решавате ништо. Вакви какви што сте, ќе може да направите сојуз со Северна Кореја – изјави Џамбаски.