ЗЕМЈОДЕЛКИТЕ РАБОТАТ НА НИВА ЦЕЛА БРЕМЕНОСТ, А ПОТОА НЕМААТ НИ ДЕН ПОРОДИЛНО „Зарем сме помалку вредни од жените во урбаните средини?“
„Зарем ние сме помалку вредни од мајките во урбаните средини и зарем не го заслужуваме правото да бидеме со своите деца во првите месеци од животот“, се прашуваат нашите соговорнички – земјоделки, кои работат на нива за време на целата бременост, а потоа немаат право ниту на еден ден породилно отсуство
Само 38% од жените во руралните средини се сметаат за економски активни, односно по некој основ се регистрирани како вршители на земјоделска дејност, додека пак сите останати, за жал, сѐ уште се на маргините на општеството и без каков било платен надоместок за својата семејна работа и придонес кон економските приходи на семејното земјоделско стопанство затоа што нашата регулатива не ја препознава семејната работа како платена работа, иако некогаш знае да трае и по 11 ипол часа на ден.
Но тоа не е единствена причини зошто жените од руралните средини се наоѓаат на маргините на општеството. Имено, земјоделките имаат можност да се регистрираат согласно Законот за пензиско и инвалидско осигурување и да плаќаат одреден минимален износ за да си ја обезбедат својата пензија и своето здравствено осигурување, но, за жал, и покрај тоа што ги исполнуваат своите обврски кон системот, тие не можат да користат платено породилно отсуство или пак боледување по било кој друг основ.
„Ваквата исклученост на жените земјоделки е утврдена во член 13 и член 14 од Законот за здравствено осигурување каде што се наведени осигурениците кои можат да остварат право на надоместок на плата и под кои услови можат да го остварат истото, а каде што во набројувањето не може да ги најдете регистрираните земјоделки согласно Законот за пензиско и инвалидско осигурување. Од една страна државата им дава можност и олеснителни околности за регистрирање, а од друга страна пак не им ги дава сите права кои што им следуваат како осигуреници во здравствениот систем. Исто така кај нас, за жал, сѐ уште не е воведено и родителското отсуство кое што ќе може да го користат и двајцата родители и така да си ги поделат обврските околу домот и грижата на децата, нешто што треба да го имаме согласно нашите усогласувања со европската регулатива, поточно директивата 2010/41/ЕУ во делот на социјална заштита, што пак само дополнително укажува на сериозноста на прашањето и на потребата од негова соодветна регулација од која што жените од руралните средини нема да бидат изоставени и дискриминирани во користењето на нивните основни човекови права и правата како осигуреници на системот“, вели Лилјана Јоноски, извршна директорка на Рурална Коалиција, организација која долги години работи на разрешувањето на ова прашање кое ги дискриминира жените од руралните средини по секоја основа и ги прави нееднакви во очите на системот и државата.
Прочитајте го целиот текст на порталот „Мајка и дете“.