Земја за пример: Има 95 милиони жители и ниту еден смртен случај од ковид-19

Виетнам ги доби сите пофалби од СЗО, поради тоа што во земјата досега нема ниту еден смртен случај, па затоа и може да служи како пример на другите држави според начинот со кој успеа да ја скроти пандемијата.

Иако граничи со Кина, Виетнам со раните и одлучувачки мерки како раширено тестирање и строг карантин, и со општествено единство, засега ја избегна ситуацијата во која коронавирусот ја доведе Европа и САД.

Бројот на заразени во Виетнам според „worldometers“ е 265, во земја која брои над 95 милиони жители.

Службената статистика покажува дека во Виетнам во карантин или изолација моментално се 75.000 лица, а досега државата направи над 121.000 тестови.

Кидонг Парк, претставник на СЗО за Виетнам, верува дека клучно за успехот на оваа земја е раното дејствување.

– Виетнам на пандемијата одговори рано и проактивно. Нивната прва вежба за проценка на ризикот се случи на почетокот на јануари, недолго откако се пријавени првите случаи во Кина – истакнува Парк и додава дека државата брзо воспоставила Национален управувачки одбор за превенција и контрола на ковид-19.

Иако има мал број на потврдени случаи, и Виетнам на 1 април ја стави целата држава во карантин, многу побрзо и поодлучно, отколку Велика Британија и Италија, кои тоа го направија дури откако бројот на заразени почна да им се смета во илјадници.