ЗЕЛС НЕ Е ИНФОРМИРАН ЗА НАМЕРИТЕ НА СТРУМИЦА ДА ИЗЛЕЗЕ Ѓорѓиевски го повикува Костадинов да не носи одлука на штета на општините и граѓаните
Одлуката за напуштање на ЗЕЛС може да ја донесе Советот на општината, а не градоначалникот. До Управниот одбор на ЗЕЛС досега не е пристигнато барање или одлука за напуштање, вели претседателот на ЗЕЛС и градоначалник на Кисела Вода, Орце Ѓорѓиевски за Плусинфо.
Во Заедницата на единиците на локалната самоуправа (ЗЕЛС) засега нема пристигнат официјален допис од Општина Струмица дека сака да ја напушти организацијата и го повикувам колегата Костадин Костадинов добро да размисли пред да донесе таква одлука која е на штета на опптината и на граѓаните, вели претседателот на ЗЕЛС и градоначалник на Кисела Вода, Орце Ѓорѓиевски за Плусинфо.
Освен Струмица, најави за напуштање на ЗЕЛС пристигнаа и од Опптика Карпош.
– Одлуката за напуштање на ЗЕЛС може да ја донесе Советот на општината, а не градоначалникот. До Управниот одбор на ЗЕЛС досега не е пристигнато барање или одлука за напуштање. Мене ми е многу жал што општините кои сакаат да го напуштат, ако имале проблем, не се обратиле до ЗЕЛС за да дискутираме и да бараме решенија – вели Ѓорѓиевски.
Одлуката за излез само ќе им донесе штета на општините и на граѓаните, додава тој, затоа што ЗЕЛС е неполитичко тело чија цел е да ги решава нивните проблеми.
– ЗЕЛС им овозможува разни алатки на општините, како е-одобрение за градба, е-урбанизам, е-ствари, градежно земјиште итн. и со излегување од ЗЕЛС овие опптини по автоматизам ќе немаат пристап до овие алатки за дигитала комуникација – вели Ѓорѓиевски.
Тој ги повикува општините добро да размислат околу одлуката за напуштање на ЗЕЛС, и да донесат издржани и аргументирани одлуки.
– Претпоставувам дека во случајот со Општина Струмица, од она што го прочитав во фејсбук-статусот на колегата Костадинов, се работи за одредени недоразбирања со одредени министри. Уште еднаш апелирам добро да размислат. Се надевам дека нема да дозволат политиката да се вмеша во ЗЕЛС и да се донесат одлуки на штета на општините и на нивните жители – апелира претседателот на ЗЕЛС.
Во ЗЕЛС членуваат сите 80 општини во Македонија, како и Град Скопје. Досена не се случило некоја локална самоуправа да ја напушти заедницата.
Денеска градоначалникот на Карпош Стевчо Јакомовски ќе одрѓи прес-конференција за намерата да го напуштат ЗЕЛС.
Вчера струмичкиот градоначалник Костадин Костадинов на фејсбук најави дека Струмица ќе ја напушти организацијата.