ЗЕЛЕНСКИ МУ ДАВА РОК ЗА СРЕДБА НА ПУТИН ДО ПОНЕДЕЛНИК Во спротивно, Киев очекува санкции за Москва од сојузниците
Две недели ќе навршат в понеделник. И ќе ги потсетиме сите, истакна украинскиот претседател барајќи дискусијата за безбедносните гаранции за Украина да се подигне на лидерско ниво и нагласил дека во неа треба да се вклучи и американскиот претседател.
Сојузниците на Украина се согласиле да почекаат до понеделник за да видат дали рускиот претседател Владимир Путин ќе покаже подготвеност за билатерална средба со украинскиот претседател Володимир Зеленски, јави Ројтерс.
– Ни треба архитектура што ќе им биде јасна на сите – рече Зеленски.
Украинскиот лидер, денеска, 29 август, потсети на претходна изјава на Трамп дека ќе му даде на Путин една или две недели да се договори за билатерална средба со украинскиот лидер пред потенцијално да објави нови мерки против Русија.
– Две недели ќе навршат в понеделник. И ќе ги потсетиме сите – истакна Зеленски барајќи дискусијата за безбедносните гаранции за Украина да се подигне на лидерско ниво и нагласил дека во неа треба да се вклучи и американскиот претседател Доналд Трамп.
Портпаролот на Путин, Дмитриј Песков, од друга страна, денеска изјави дека Путин е спремен за средба со Трамп, но дека средбата мора да биде добро подготвена.
Зеленски додаде дека во наредниот период очекува да продолжи со разговорите со европските лидери за обврски слични на оние на НАТО алијансата. Украинскиот претседател сака и сите безбедносни гаранции да се ратификуваат преку парламентите на сојузниците.
– Потоа сакаме да го контактираме претседателот Трамп за време на состанокот… и да му кажеме како го гледаме тоа. Сакаме правнообврзувачки безбедносни гаранции. Не сакаме (уште еден) Будимпештански меморандум – истакна тој, алудирајќи на договорот од 1994 година кога Украина се откажа од нуклеарното оружје.
Според Скај њуз, дискусијата за билатерален состанок со Русија останува отворена до понеделник, а ако нема чекори од Москва, Киев очекува реакција од западните партнери. Паралелно, европските министри за одбрана денес се собраа во Копенхаген за да разговараат за поддршката за Украина.
– Владимир Путин се потсмева на секој обид за постигнување мир – изјави шефицата за европска надворешна политика Каја Калас.
Претседателката на Европската комисија Урсула фон дер Лајен од Латвија испрати порака:
„Европа е безбедна само ако нејзината источна граница е безбедна“.
Претседателот на САД, Доналд Трамп, на 25 август изјави дека е подготвен да воведе економски санкции врз Русија доколку рускиот претседател Владимир Путин не се согласи на прекин на огнот, предупредувајќи за сериозни последици.
– Сакаме да заврши. Имаме економски санкции. Зборувам за економски мерки бидејќи нема да влеземе во светска војна – рече Трамп.
Трамп во таа изјава не постави нов временски рок за спроведување на санкциите доколку војната во Украина не биде запрена, објави „Си-ен-ен“.